परिवर्तनवादी साहित्य संमेलनात कवितेला उत्स्फूर्त दाद; मान्यवरांच्या हस्ते सन्मान
छत्रपती संभाजीनगर प्रतिनिधी : पहिल्या राज्यस्तरीय परिवर्तनवादी साहित्य संमेलनात सुप्रसिद्ध कवी, गायक व शाहीर विजय मोकळे करंजगावकर यांच्या ‘सरकार मायबाप’ या कवितेने विशेष लक्ष वेधून घेतले. दुष्काळ, सामाजिक विषमता, सर्वसामान्यांच्या व्यथा आणि व्यवस्थेच्या वर्चस्वावर परखड भाष्य करणाऱ्या या कवितेला रसिकांनी टाळ्यांच्या कडकडाटात उत्स्फूर्त दाद दिली. प्रभावी सादरीकरणाबद्दल मोकळे यांचा मान्यवरांच्या हस्ते ट्रॉफी व शाल देऊन सन्मान करण्यात आला.
रविवारी (दि. १८ ऑक्टोबर) तापडिया नाट्यगृहात आयोजित या संमेलनाच्या अध्यक्षस्थानी ज्येष्ठ साहित्यिक श्रीपाल सबनीस होते. सामाजिक न्यायमंत्री संजय शिरसाट यांच्या हस्ते संमेलनाचे उद्घाटन झाले. मुख्य संयोजक रतनकुमार साळवे आणि कार्याध्यक्ष ॲड. रामेश्वर तायडे यांनी आयोजनाची जबाबदारी सांभाळली.
संमेलनाची सुरुवात ग्रंथदिंडीने झाली. त्यानंतर झालेल्या परिसंवादात परिवर्तनवादी साहित्य, सामाजिक वास्तव आणि वैचारिक चळवळींच्या दिशेवर विचारमंथन झाले. अध्यक्षीय भाषणात श्रीपाल सबनीस यांनी डॉ. बाबासाहेब आंबेडकर यांच्या विचारांचा अभ्यास करून ते आचरणात आणण्याचे आवाहन केले.
सुप्रसिद्ध कवी अनंत राऊत यांच्या अध्यक्षतेखाली झालेल्या कवी संमेलनात विजय मोकळे यांनी ‘सरकार मायबाप’ ही कविता सादर केली. दुष्काळाने त्रस्त शेतकरी, आर्थिक-सामाजिक विषमता, सामान्य माणसाला न्याय मिळवताना येणाऱ्या अडचणी आणि व्यवस्थेच्या हुकूमशाही प्रवृत्तीकडे होणारी वाटचाल या मुद्द्यांवर त्यांनी आपल्या कवितेतून भाष्य केले. सामान्य जनतेच्या प्रश्नांकडे होणारे दुर्लक्ष आणि प्रस्थापित व्यवस्थेतील विसंगती त्यांनी परखड शब्दांत मांडल्या.
कवितेतील सामाजिक जाणीव, आक्रमक सादरीकरण आणि सामान्यांच्या वेदनांना आवाज देणाऱ्या शब्दरचनेमुळे सभागृहात वारंवार टाळ्यांचा कडकडाट झाला. कवी अनंत राऊत यांनीही टाळ्या वाजवून कवितेला दाद दिली.
या प्रभावी सादरीकरणानंतर साहित्यिक वाठोरे सर, कवी अनंतराव राऊत आणि संमेलनाचे मुख्य संयोजक रतनकुमार साळवे यांच्या हस्ते विजय मोकळे करंजगावकर यांना ट्रॉफी व शाल देऊन गौरविण्यात आले.
सन १९९३ पासून सामाजिक प्रबोधनाच्या क्षेत्रात कार्यरत असलेल्या विजय मोकळे यांनी कविता, गायन, शाहिरी आणि व्याख्यानांच्या माध्यमातून समाजप्रबोधनाची परंपरा जपली आहे. ‘सरकार मायबाप’ या कवितेच्या माध्यमातून त्यांनी परिवर्तनवादी साहित्याचे सामर्थ्य अधोरेखित करत सामान्य माणसाच्या हक्कांचा आणि न्यायाचा प्रश्न पुन्हा एकदा ऐरणीवर आणला.
