जिल्हास्तरीय पुरस्कारप्राप्त लांडे वस्ती खंबाळा जि.प. शाळेचा थाटात गुणगौरव
वैजापूर (प्रतिनिधी : विजयकुमार मोकळे) : वैजापूर शहरालगत असलेल्या जिल्हा परिषद प्राथमिक शाळा लांडे वस्ती (खंबाळा) हिला नुकताच ‘जिल्हास्तरीय आदर्श शाळा पुरस्कार’ प्राप्त झाल्याने शाळेच्या शिरपेचात मानाचा तुरा रोवला गेला आहे. या उल्लेखनीय यशाबद्दल शाळेचा विशेष गुणगौरव सोहळा आयोजित करण्यात आला.
दैनिक सकाळचे पत्रकार व सामाजिक कार्यकर्ते प्रशांत त्रिभुवन, शाहीर तथा व्याख्याते विजय मोकळे (करंजगावकर) आणि वाळेकर सर यांच्या वतीने शाळेचे मुख्याध्यापक, शिक्षकवृंद तसेच शालेय शिक्षण समितीचा शाल व श्रीफळ देऊन सत्कार करण्यात आला.
कार्यक्रमाच्या अध्यक्षस्थानी शालेय शिक्षण समितीचे अध्यक्ष शिवाजी पुंजाबा लांडे होते.
यावेळी बोलताना सामाजिक कार्यकर्ते प्रशांत त्रिभुवन यांनी शाळेच्या पायाभरणीपासून आजवरच्या यशस्वी वाटचालीचा आढावा घेत गुणात्मक शिक्षण, शिक्षकांची मेहनत आणि विद्यार्थ्यांच्या सर्वांगीण विकासाचे महत्त्व अधोरेखित केले. ग्रामीण भागातील शाळा केवळ शिक्षणाचे केंद्र न राहता विद्यार्थ्यांच्या भवितव्याला आकार देणारे सक्षम व्यासपीठ ठरू शकतात, असे त्यांनी सांगितले.
कार्यक्रमात शाहीर विजय मोकळे (करंजगावकर) यांनी आपल्या गाजलेल्या ‘बाप’ या कवितेचे सादरीकरण करत उपस्थितांशी आणि विद्यार्थ्यांशी भावनिक संवाद साधला. त्यांच्या काव्यसादरीकरणाला उपस्थितांनी उत्स्फूर्त प्रतिसाद दिला.
कार्यक्रमाच्या प्रारंभी शाळेचे मुख्याध्यापक सुमित सरकटे यांनी उपस्थितांचे स्वागत केले. यावेळी सहशिक्षक प्रवीण म्हस्के, वैशाली सुरासे, कविता राजपूत, शिक्षकवृंद तसेच विद्यार्थी मोठ्या संख्येने उपस्थित होते.
नव्या रूपाला आलेली शाळा, समर्पित शिक्षक आणि गुणवंत विद्यार्थी यांचा सुंदर संगम या कार्यक्रमातून अनुभवायला मिळाला. जिल्हास्तरीय आदर्श शाळा पुरस्कार मिळवून लांडे वस्ती खंबाळा शाळेने ग्रामीण भागातील जिल्हा परिषद शाळांसाठी प्रेरणादायी आदर्श निर्माण केला आहे.
भावी पिढी घडविणाऱ्या अशा जिल्हा परिषद शाळांचा अधिकाधिक विकास व्हावा आणि पालकांनीही आपल्या पाल्यांना गुणवत्तापूर्ण शिक्षण देणाऱ्या सरकारी शाळांकडे विश्वासाने वळवावे, असा सकारात्मक संदेश या गुणगौरव सोहळ्यातून देण्यात आला.
