गंगापूरच्या धर्तीवर लाभ देण्याची आजाद समाज पार्टीची मागणी; प्रलंबित प्रस्ताव तातडीने निकाली काढण्याचे आवाहन
वैजापूर, प्रतिनिधी विजयकुमार मोकळे करंजगावकर : प्रधानमंत्री आवास योजना, रमाई आवास योजना, शबरी आवास योजना तसेच अन्य शासकीय घरकुल योजनांतर्गत मंजूर झालेल्या पात्र लाभार्थ्यांना घरकुल बांधकामासाठी प्रत्येकी पाच ब्रास वाळू मोफत उपलब्ध करून द्यावी, अशी आग्रही मागणी आजाद समाज पार्टी (का.)च्या वतीने करण्यात आली आहे. याबाबत १७ ऑगस्ट रोजी नायब तहसीलदार कुमावत तसेच पंचायत समितीचे गटविकास अधिकारी जायेभाय यांना निवेदन देण्यात आले.
गंगापूरच्या धर्तीवर वैजापूरलाही लाभ द्या!
गंगापूर तालुक्यातील सुमारे ४०० घरकुल लाभार्थ्यांना पाच ब्रास वाळू उपलब्ध करून देण्यात आली आहे. त्याच धर्तीवर वैजापूर तालुक्यातील पात्र लाभार्थ्यांनाही तातडीने वाळू उपलब्ध करून द्यावी, अशी मागणी निवेदनातून करण्यात आली.
जिल्हाधिकाऱ्यांनी वैजापूर व गंगापूर तालुक्यातील घरकुल लाभार्थ्यांना वाळू उपलब्ध करून देण्याबाबत तहसील प्रशासनाला आदेश दिल्याचे सूत्रांकडून सांगण्यात येत आहे. त्यामुळे गंगापूरप्रमाणे वैजापूरमधील पात्र लाभार्थ्यांनाही या योजनेचा लाभ मिळावा, अशी भूमिका पक्षाने मांडली.
वाळूच्या वाढत्या दरामुळे लाभार्थी आर्थिक अडचणीत
घरकुल बांधकामासाठी मोठ्या प्रमाणात वाळूची आवश्यकता असते. मात्र वाळूच्या वाढलेल्या किमतीमुळे आर्थिकदृष्ट्या दुर्बल लाभार्थ्यांवर अतिरिक्त आर्थिक भार पडत असून अनेकांचे घरकुल बांधकाम रखडले आहे. त्यामुळे शासनाने पाच ब्रास वाळू मोफत उपलब्ध करून देऊन लाभार्थ्यांना दिलासा द्यावा, अशी मागणी करण्यात आली.
विजयकुमार मोकळे करंजगावकर यांचा पाठपुरावा
सामाजिक कार्यकर्ते विजय मोकळे करंजगावकर यांनी घरकुल लाभार्थ्यांना पाच ब्रास वाळू मिळावी यासाठी सातत्याने पाठपुरावा केला आहे. लाभार्थ्यांना वाळूसाठी अनावश्यक कार्यालयीन हेलपाटे मारावे लागू नयेत, कोणतेही अनधिकृत शुल्क आकारले जाऊ नये, तसेच प्रत्येक ग्रामपंचायतीनुसार लाभार्थ्यांची संख्या आणि उपलब्ध करून दिलेल्या वाळूचा तपशील सार्वजनिक करावा, अशी मागणीही करण्यात आली.
प्रलंबित प्रस्ताव तातडीने निकाली काढा
वैजापूर तालुक्यातील विविध गावांमधील घरकुल लाभार्थ्यांचे वाळू मागणीचे प्रस्ताव पंचायत समिती कार्यालयात प्रलंबित असल्याचे निवेदनात नमूद करण्यात आले आहे. हे प्रस्ताव तातडीने निकाली काढून पात्र लाभार्थ्यांना पाच ब्रास वाळू उपलब्ध करून द्यावी, अशी मागणी करण्यात आली.यावेळी पक्षाचे पदाधिकारी व कार्यकर्ते उपस्थित होते.
“गंगापूर तालुक्यातील लाभार्थ्यांना पाच ब्रास वाळूचा लाभ मिळत आहे. त्याच धर्तीवर वैजापूर तालुक्यातील पात्र लाभार्थ्यांनाही तातडीने वाळू उपलब्ध करून द्यावी आणि जिल्हाधिकाऱ्यांच्या आदेशाची प्रभावी अंमलबजावणी करावी,”
……विजय शिनगारे,जिल्हाध्यक्ष आजाद समाज पार्टी.
