बोपगाव येथील गोदामावर छापा; सिराज शेखविरुद्ध गुन्हा दाखल, अर्चना पाटील यांच्या पथकाची कारवाई
पुणे, सासवड प्रतिनिधी दि.२७ जून : पुणे जिल्ह्यातील सासवड पोलिसांनी प्रतिबंधित गुटखा व पान मसाल्याच्या अवैध साठ्यावर मोठी कारवाई करत तब्बल ₹२९ लाख ७० हजार १६० रुपयांचा मुद्देमाल जप्त केला. ही कारवाई २५ जून रोजी गोपनीय माहितीच्या आधारे बोपगाव (ता. पुरंदर) येथील एका गोदामावर छापा टाकून करण्यात आली.
पोलिसांना मिळालेल्या गोपनीय माहितीनुसार पोलिस उपनिरीक्षक अर्चना पाटील यांच्या पथकाने संबंधित गोदामावर धाड टाकली. छाप्यात महाराष्ट्र शासनाने प्रतिबंधित केलेला ‘सिनियर फिस्ट’ पान मसाला, ‘आर. के.’ कंपनीचा स्वाद पान मसाला आणि ‘एस. टी.-१’ कंपनीची सुगंधी तंबाखू असा मोठ्या प्रमाणातील साठा जप्त करण्यात आला.
या प्रकरणी सिराज शेख (रा. कोंढवा खुर्द, पुणे) याच्याविरुद्ध सासवड पोलिस ठाण्यात भारतीय न्याय संहिता (BNS) तसेच अन्न सुरक्षा व मानके अधिनियम अंतर्गत गुन्हा दाखल करण्यात आला आहे. या प्रकरणाचा पुढील तपास पोलिस उपनिरीक्षक अर्चना पाटील करत आहेत.
ही कारवाई पुणे ग्रामीण पोलिस अधीक्षक संदीपसिंह गिल, अपर पोलिस अधीक्षक गणेश बिराजदार आणि उपविभागीय पोलिस अधिकारी राजेंद्रसिंह गौर यांच्या मार्गदर्शनाखाली पोलिस निरीक्षक संतोष ढोले, पोलिस उपनिरीक्षक अर्चना पाटील व त्यांच्या पथकाने यशस्वीपणे पार पाडली.
