कारवाई न झाल्यास राज्यभर शिवसेना आणि लोकप्रतिनिधींच्या बातम्यांवर बहिष्काराचा इशारा
पिंपरी, दि.२७ जून : पत्रकारांना उद्देशून केलेल्या आक्षेपार्ह वक्तव्याच्या निषेधार्थ मराठी पत्रकार संघाच्या वतीने शुक्रवारी चिंचवड येथे तीव्र आंदोलन करण्यात आले. संबंधित खासदार संजय दिना पाटील यांनी केवळ माफी मागून विषय संपणार नसून, त्यांच्यावर पक्षाने तातडीने शिस्तभंगाची कारवाई करावी, अन्यथा राज्यभर शिवसेना पक्ष आणि त्यांच्या लोकप्रतिनिधींच्या बातम्यांवर बहिष्कार टाकण्याचा इशारा संघटनेने दिला.
चिंचवड येथील के.एस.बी. चौकातील राजर्षी छत्रपती शाहू महाराज यांच्या पुतळ्यासमोर हे आंदोलन पार पडले. प्रारंभी शाहू महाराजांच्या पुतळ्यास पुष्पहार अर्पण करून अभिवादन करण्यात आले. त्यानंतर पत्रकारांनी घोषणाबाजी करत निषेध व्यक्त केला.
आंदोलनादरम्यान “प्रश्न विचारणे गुन्हा असेल, तर हो… आम्ही गुन्हेगार!” अशा आशयाचे फलक झळकावण्यात आले. पत्रकारांचा आवाज दाबण्याचा कोणताही प्रयत्न सहन केला जाणार नाही, अशी ठाम भूमिका मराठी पत्रकार संघाच्या पदाधिकाऱ्यांनी मांडली.
मराठी पत्रकार संघाचे प्रदेश उपाध्यक्ष विवेक इनामदार, पुणे जिल्हाध्यक्ष संजय मराठे, तसेच विकास साळवे आणि संगीता पाचंगे यांनी मनोगत व्यक्त करताना सांगितले की, लोकशाहीच्या चौथ्या स्तंभावर दबाव आणण्याचा अथवा पत्रकारांना धमकावण्याचा प्रयत्न म्हणजे लोकशाहीवरील थेट हल्ला आहे. पत्रकार प्रश्न विचारणे थांबवणार नाहीत. संबंधित खासदारावर पक्षाने कारवाई केली नाही, तर राज्यभर तीव्र आंदोलन छेडण्यात येईल, असा इशाराही त्यांनी दिला.
या आंदोलनात पुणे व पिंपरी-चिंचवड परिसरातील पत्रकार मोठ्या संख्येने सहभागी झाले होते. यावेळी विवेक कुलकर्णी, बजरंग मासाळ, संतोष महामुनी, रोहित खर्गे, नागेश खजुर्गीकर, पराग डिंगणकर, उमेश सणस, तौफीक सय्यद, गजाला सय्यद, आसीया इनामदार, उमेश पाटील, जगदीश बच्छाव यांच्यासह मराठी पत्रकार संघाचे पदाधिकारी, सदस्य आणि पत्रकार उपस्थित होते.
आंदोलनाच्या शेवटी, खासदार संजय दिना पाटील यांच्यावर पक्षाकडून योग्य ती शिस्तभंगाची कारवाई न झाल्यास राज्यभर शिवसेना पक्ष आणि त्यांच्या लोकप्रतिनिधींच्या बातम्यांवर बहिष्कार टाकण्याचा निर्णय घेण्यात येईल, असे मराठी पत्रकार संघाने स्पष्ट केले.
