भेसळ ओळखण्यासाठी राज्यभर जनजागृती शिबिरे घेण्याचीही मागणी
पिंपरी, दि.२७ जून : राज्यातील बोगस डॉक्टर, बनावट औषधांची निर्मिती व विक्री करणारे तसेच दूध आणि अन्नधान्यात भेसळ करणाऱ्यांवर महाराष्ट्र संघटित गुन्हेगारी नियंत्रण कायदा (मकोका) अंतर्गत कठोर कारवाई करण्यात यावी, अशी मागणी राष्ट्रवादी काँग्रेस पार्टी झोपडपट्टी सेलचे पिंपरी-चिंचवड शहराध्यक्ष रवींद्र ओव्हाळ यांनी मुख्यमंत्री देवेंद्र फडणवीस यांच्याकडे केली आहे.
याबाबतचे निवेदन ओव्हाळ यांनी मुख्यमंत्र्यांना पाठवले असून, त्यात राज्यातील नागरिकांच्या आरोग्याशी खेळ करणाऱ्या टोळ्यांवर कठोर कारवाईची आवश्यकता अधोरेखित करण्यात आली आहे.
पत्रात नमूद केल्याप्रमाणे, नुकत्याच विधान परिषदेत गृहराज्यमंत्री योगेश कदम यांनी दापोडी व फुगेवाडी येथील विषारी दारू प्रकरणातील आरोपींवर ‘मकोका’ अंतर्गत कारवाई केली जाणार असल्याची माहिती दिली. तसेच भविष्यात अशा घटना टाळण्यासाठी पोलीस, राज्य उत्पादन शुल्क विभाग आणि अन्न व औषध प्रशासन यांच्या संयुक्त कारवाईचेही आश्वासन दिले.
रवींद्र ओव्हाळ यांनी सांगितले की, दापोडी विषारी दारू प्रकरणातील आरोपींवर ‘मकोका’ लावण्याची मागणी त्यांनी ३० मे २०२६ रोजीच मुख्यमंत्र्यांकडे केली होती. सरकारने या मागणीची गंभीर दखल घेतल्याबद्दल त्यांनी मुख्यमंत्री देवेंद्र फडणवीस आणि गृहराज्यमंत्री योगेश कदम यांचे आभार मानले.
ओव्हाळ यांनी पत्रात पुढे म्हटले आहे की, राज्यात गुटखा बंदी असतानाही त्याची खुलेआम विक्री सुरू आहे. अन्न व औषध प्रशासनाने राज्यभर धाडी टाकून कारवाई सुरू केली असून, नागपूरसह विविध ठिकाणी बोगस डॉक्टर नागरिकांवर उपचार करत असल्याचे तसेच बनावट औषधे आणि दूध व अन्नधान्यात भेसळ होत असल्याचे उघडकीस आले आहे. अशा प्रकारांमुळे नागरिकांच्या आरोग्याला गंभीर धोका निर्माण होत आहे.
यामुळे नागरिकांनी बोगस डॉक्टरांकडून उपचार घेऊ नयेत तसेच बनावट औषधे आणि भेसळयुक्त अन्नपदार्थ कसे ओळखावेत, यासाठी शासनाने राज्यभर जनजागृती शिबिरे आयोजित करावीत, अशीही मागणी त्यांनी केली आहे.
राज्यातील बोगस डॉक्टर, बनावट औषध उत्पादक व विक्रेते तसेच दूध आणि अन्नधान्यात भेसळ करणाऱ्या टोळ्यांवरही ‘मकोका’ अंतर्गत कारवाई करून नागरिकांच्या जीविताचे संरक्षण करावे, अशी मागणी रवींद्र ओव्हाळ यांनी मुख्यमंत्र्यांकडे केली आहे.
