पुणे | प्रतिनिधी.….प्रसिद्ध बांधकाम व्यावसायिक विशाल देवीचंद अगरवाल यांचा मुलगा केतन अगरवाल (वय २५) याचा लोणावळ्यातील ऐतिहासिक लोहगड किल्ल्यावरून दरीत पडून मृत्यू झाल्याची घटना सुरुवातीला अपघात मानली जात होती. मात्र, लोणावळा ग्रामीण पोलिसांनी सखोल तपास करत या प्रकरणाचा धक्कादायक उलगडा केला असून, केतनचा खून त्याच्या होणाऱ्या पत्नीने तिच्या प्रियकराच्या मदतीने केल्याचे समोर आले आहे. या प्रकरणी पोलिसांनी दोन्ही आरोपींना अटक केली आहे.
अटक करण्यात आलेल्या आरोपींची नावे सिया प्रविण गोयल (वय २०, रा. बिबवेवाडी, पुणे) आणि चेतन बाबुलाल चौधरी (वय २२, रा. कोंढवा बुद्रुक, पुणे) अशी आहेत. १८ जून रोजी, स्वतःच्या वाढदिवशीच केतनचा मृत्यू झाल्याने पिंपरी-चिंचवड आणि मावळ तालुक्यात मोठी खळबळ उडाली होती.
घटनेनंतर सिया गोयल हिने केतनचा पाय घसरून तो दरीत पडल्याची माहिती पोलिसांना दिली होती. त्यानुसार लोणावळा ग्रामीण पोलिसांनी सुरुवातीला अपघाती मृत्यूची नोंद केली होती. मात्र, घटनेबाबत संशय निर्माण झाल्यानंतर पोलिसांनी अधिक तपास सुरू केला. तपासादरम्यान सिया गोयल हिचे चेतन चौधरी याच्याशी प्रेमसंबंध असल्याची माहिती समोर आली. त्यानंतर पोलिसांनी दोघांची कसून चौकशी केली असता, केतन त्यांच्या संबंधांमध्ये अडसर ठरत असल्याने त्याचा काटा काढण्यासाठी कट रचल्याचे उघड झाले.
पोलिसांनी दिलेल्या माहितीनुसार, केतनच्या वाढदिवशी त्याला लोहगडावर फिरायला नेण्यात आले आणि संधी साधून त्याला दरीत ढकलण्यात आले. त्यानंतर हा प्रकार अपघात असल्याचा बनाव करून पोलिसांची दिशाभूल करण्याचा प्रयत्न करण्यात आला. मात्र, तपासातील तांत्रिक आणि परिस्थितीजन्य पुराव्यांच्या आधारे पोलिसांनी हा कट उघडकीस आणला.
केतन अगरवाल याचा विवाह येत्या नोव्हेंबर महिन्यात राजस्थानमधील उदयपूर येथे शाही पद्धतीने होणार होता. त्यासाठी पॅलेससह दोन विमानेही बुक करण्यात आली होती. दोन्ही कुटुंबांमध्ये लग्नाची तयारी सुरू असतानाच घडलेल्या या घटनेने अगरवाल कुटुंबासह दोन्ही कुटुंबांवर शोककळा पसरली आहे.
या प्रकरणाची गंभीर दखल घेत पुणे ग्रामीणचे पोलिस अधीक्षक संदीपसिंग गिल्ल यांनी स्थानिक गुन्हे शाखेला (एलसीबी) समांतर तपास करण्याचे आदेश दिले होते. त्यानुसार दोन पथके तयार करून तपास सुरू करण्यात आला. प्रॉपर्टी वाद, वैयक्तिक वैमनस्य किंवा प्रेमसंबंध या सर्व शक्यतांचा तपास करण्यात आला. त्यातून सिया गोयल हिचे दुसऱ्या तरुणासोबत प्रेमसंबंध असल्याची खात्रीशीर माहिती मिळाली आणि पुढील चौकशीत खुनाचा कट उघड झाला.
यानंतर लोणावळा ग्रामीण पोलिसांनी अपघाती मृत्यूची नोंद रद्द करून सिया गोयल आणि चेतन चौधरी यांच्याविरुद्ध खुनाचा गुन्हा दाखल केला आहे.
सदर ही कारवाई पोलिस अधीक्षक संदीपसिंग गिल्ल,अप्पर पोलिस अधीक्षक शुभम कुमार, उपविभागीय पोलिस अधिकारी गजानन टोप्पे आणि पोलिस उपअधीक्षक (गृह) राजेंद्र मायने यांच्या मार्गदर्शनाखाली करण्यात आली. या तपासात एलसीबीचे पोलिस निरीक्षक प्रमोद क्षीरसागर, लोणावळा ग्रामीणचे पोलिस निरीक्षक दिनेश तायडे, सहाय्यक पोलिस निरीक्षक मनोज पवार, उपनिरीक्षक अभिजीत सावंत आणि त्यांच्या पथकाने महत्त्वाची भूमिका बजावली.
