२४ जून रोजी कलशारोहण, मूर्ती प्रतिष्ठापना, महापूजा व महाप्रसादाचे आयोजन; भाविकांना सहपरिवार उपस्थित राहण्याचे आवाहन
पुणे,कामठवाडी (वाल्हे), दि.२३ जून : मौजे कामठवाडी (वाल्हे) येथे धार्मिक आणि भक्तिमय वातावरणात श्री कानिफनाथ मंदिर, श्री शिव मंदिर आणि श्री खंडोबा मंदिर यांच्या भव्य प्राणप्रतिष्ठापना व कलशारोहण सोहळ्याचे आयोजन करण्यात आले आहे. बुधवार, दि. २४ जून २०२६ रोजी सकाळी ७ ते सायंकाळी ४ वाजेपर्यंत विविध धार्मिक विधी, पूजाविधी आणि महाप्रसादाचा कार्यक्रम होणार असून, या मंगलमय सोहळ्यासाठी भाविकांनी मोठ्या संख्येने उपस्थित राहावे, असे आवाहन आयोजकांकडून करण्यात आले आहे.
या धार्मिक सोहळ्याच्या निमित्ताने परिसरात उत्साहाचे वातावरण निर्माण झाले असून, सकाळी श्रींच्या मिरवणुकीने कार्यक्रमाची सुरुवात होणार आहे. त्यानंतर पुण्याहवाचन, गणेशपूजन, होम-हवन, जलाधिवास, वास्तुपूजन, मूर्ती प्राणप्रतिष्ठापना आणि कलशारोहण असे विविध धार्मिक विधी पार पडणार आहेत. दुपारनंतर महापूजा व महाप्रसादाचा कार्यक्रम आयोजित करण्यात आला आहे.
या सोहळ्यास डॉ. प्रा. दिगंबर गणपत दुर्गाडे हे मार्गदर्शक म्हणून लाभणार असून, डॉ. प्राजक्ता दिगंबर दुर्गाडे या समन्वयक म्हणून कार्यरत आहेत. तसेच ह.भ.प. कालिदास महाराज, दत्त संस्थान मढी हे मुख्य यज्ञाचार्य म्हणून धार्मिक विधींचे मार्गदर्शन करणार आहेत.
मुख्य कार्यक्रमाचे वेळापत्रक
💮श्रींची मिरवणूक — सकाळी ७.०० ते ९.००
💮पुण्याहवाचन — सकाळी ९.३० ते १०.००
💮गणेशपूजन — सकाळी १०.०० ते १०.३०
💮होम-हवन — सकाळी १०.३० ते ११.००
💮जलाधिवास — सकाळी ११.०० ते ११.३०
💮होम-हवन व वास्तुपूजन — सकाळी ११.३० ते दुपारी १२.००
💮मूर्ती प्राणप्रतिष्ठापना — दुपारी १२.०० ते १२.३
💮 कलशारोहण — दुपारी १२.३० ते १.००
💮कलशपूजन — दुपारी १.०० ते १.३०
💮महापूजा व महाप्रसाद — दुपारी १.०० ते सायंकाळी ४.००
या शुभप्रसंगी समस्त ग्रामस्थ, कामठवाडी यांनी सर्व भाविकांना सहकुटुंब उपस्थित राहून धर्मकार्याची शोभा वाढविण्याचे आवाहन केले आहे.
