पिंपरी-चिंचवड | प्रतिनिधी….शिवसेना (उद्धव बाळासाहेब ठाकरे) पक्षाच्या वतीने पिंपरी-चिंचवड शहरात सहा खासदारांनी दुसऱ्या शिवसेना पक्षात प्रवेश केल्याच्या निषेधार्थ सोमवारी जोरदार ‘तुडवा आंदोलन’ करण्यात आले. शहरातील डॉ. बाबासाहेब आंबेडकर स्मारकाजवळ पार पडलेल्या या आंदोलनात पक्षाचे पदाधिकारी, कार्यकर्ते आणि महिला आघाडीच्या कार्यकर्त्यांचा मोठ्या संख्येने सहभाग होता.
आंदोलनादरम्यान शिवसेना (उद्धव बाळासाहेब ठाकरे) पक्षाचे शहराध्यक्ष चेतन पवार यांनी माध्यमांशी संवाद साधत बंडखोर खासदारांवर तीव्र शब्दांत टीका केली. पक्षाच्या बळावर मोठे होत नंतर गद्दारी करून दुसऱ्या पक्षात जाण्याची प्रवृत्ती वाढत असल्याचा आरोप त्यांनी केला. तसेच, उपमुख्यमंत्री एकनाथ शिंदे यांच्या नेतृत्वाखालील शिवसेनेवरही त्यांनी निशाणा साधला.
“आज सहा खासदार गेले असले, तरी भविष्यात त्यापेक्षा अधिक खासदार निवडून आणण्याची ताकद पक्षप्रमुख उद्धव ठाकरे यांच्या नेतृत्वात आहे,” असा विश्वास चेतन पवार यांनी व्यक्त केला. पिंपरी-चिंचवडमध्ये या खासदारांनी येण्याचा प्रयत्न केल्यास त्यांना तीव्र जनक्षोभ आणि विरोधाला सामोरे जावे लागेल, असा इशाराही त्यांनी यावेळी दिला.
या आंदोलनातून पक्षनिष्ठा, गद्दारीविरोधातील भूमिका आणि आगामी राजकीय लढाईसाठी कार्यकर्त्यांची एकजूट दाखवून देण्याचा प्रयत्न शिवसेनेकडून करण्यात आल्याचे चित्र पाहायला मिळाले.
