पिंपरी-चिंचवड | २३ जून २०२६…चिखलीतील कुदळवाडी परिसरातील डायमंड चौक येथे असलेल्या भंगाराच्या गोदामाला मंगळवारी (दि. २३) पहाटे भीषण आग लागल्याची घटना घडली. पहाटे सुमारे चार वाजण्याच्या सुमारास लागलेल्या या आगीमुळे परिसरात काही काळ भीतीचे वातावरण निर्माण झाले होते. आगीमुळे धुराचे मोठे लोट उसळल्याने परिसरात खळबळ उडाली.
घटनेची माहिती मिळताच पिंपरी-चिंचवड महापालिकेच्या अग्निशामक विभागाने तातडीने घटनास्थळी धाव घेतली. अग्निशामक दलाचे तब्बल दहा बंब घटनास्थळी दाखल करण्यात आले. गोदामामध्ये मोठ्या प्रमाणावर भंगार साहित्य साठवून ठेवण्यात आल्याने आग झपाट्याने पसरत होती. मात्र अग्निशामक जवानांनी शर्थीचे प्रयत्न करत अनेक तासांच्या अथक परिश्रमानंतर आगीवर नियंत्रण मिळवले.
दरम्यान, गोदामातील काही भागांत अद्याप धुमस सुरू असल्याने आग पूर्णपणे विझविण्याचे काम युद्धपातळीवर सुरू आहे. या आगीत भंगार साहित्याचे मोठ्या प्रमाणावर नुकसान झाल्याचा प्राथमिक अंदाज व्यक्त करण्यात येत आहे. सुदैवाने या घटनेत कोणतीही जीवितहानी झालेली नाही.
आग लागण्यामागील नेमके कारण अद्याप समोर आलेले नसून संबंधित यंत्रणांकडून याप्रकरणी अधिक चौकशी सुरू आहे. अग्निशामक दलाच्या तत्पर आणि प्रभावी कारवाईमुळे संभाव्य मोठी दुर्घटना टळल्याचे बोलले जात आहे.
