पिंपरी : स्पाईन रोडवर किरकोळ कारणावरून कार अडवून चालक व त्याच्या नातेवाईकाला शिवीगाळ, मारहाण करत कारची काच फोडल्याची धक्कादायक घटना समोर आली आहे. या प्रकरणी उत्तर महाळुंगे पोलीस ठाण्यात गुन्हा दाखल करण्यात आला आहे.
पोलीसांनी दिलेल्या माहितीनुसार, उत्तर महाळुंगे पोलीस ठाणे गु.रजि. नं. ५४७/२०२६ अन्वये बीएनएस कलम १२५ (ब) प्रमाणे गुन्हा दाखल करण्यात आला आहे. ही घटना दि. १९ जून २०२६ रोजी रात्री १०.२० वाजण्याच्या सुमारास पूर्णानगर येथील इंडियन ऑईल पेट्रोल पंपाजवळ, स्पाईन रोड ते कृष्णानगर जाणाऱ्या रस्त्यावर घडली.
या प्रकरणी शुभम संजय चोरमले (वय २६, व्यवसाय कारचालक, रा. सेंट अॅन स्कूलजवळ, पत्राशेड, कृष्णानगर, चिखली, पुणे; मूळ रा. झेंडेवाडी, ता. भूम, जि. धाराशिव) यांनी फिर्याद दिली आहे. पोलिसांनी हुंदाई आय-१० कार क्रमांक MH 14 JW 7744 वरील चालक आणि त्याच्यासोबतचे दोन अनोळखी इसम यांच्याविरुद्ध गुन्हा दाखल केला आहे.
फिर्यादीनुसार, शुभम चोरमले हे साक्षीदार जयराम चोरमले यांच्यासह त्यांच्या हुंदाई ऑरा कारने जात असताना आरोपींच्या हुंदाई आय-१० कारने त्यांना थांबण्याचा इशारा केला. फिर्यादींनी कार साईडला घेत असतानाच आरोपींच्या कारने त्यांच्या वाहनाला घासून पुढे जाऊन रस्ता अडवला. त्यानंतर आरोपी खाली उतरून फिर्यादी व साक्षीदाराला शिवीगाळ करू लागले.
यावेळी आरोपी चालकाने, “अशी गाडी चालवतो काय? मी तुला थांब म्हणालो तरी तू थांबला नाही, तुला लय मस्ती आली आहे काय?” असे म्हणत दमदाटी केली. त्याच्यासोबतच्या एका इसमाने हातातील कड्याने फिर्यादीच्या कारची पुढील काच फोडून नुकसान केले. त्यानंतर तिघांनी फिर्यादी व साक्षीदाराला हाताने मारहाण केली. कारची काच फोडणाऱ्या इसमाने हातातील कड्याने फिर्यादीच्या नाकावर वार करून दुखापत केल्याचे फिर्यादीत नमूद आहे.
या प्रकरणाचा पुढील तपास सपोनि चव्हाण यांच्या मार्गदर्शनाखाली सुरू आहे.
