पिंपरी, दि. २२ जून – एमएनजीएल गॅस एजन्सीमधून बोलत असल्याचा बनाव करून व्हॉट्सअॅप कॉलद्वारे एका ज्येष्ठ नागरिकाची तब्बल ११ लाख ३९ हजार ९९७ रुपयांची ऑनलाईन फसवणूक झाल्याची धक्कादायक घटना चिंचवड परिसरात उघडकीस आली आहे. या प्रकरणी चिंचवड पोलीस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, ही घटना दि. २६ एप्रिल २०२६ रोजी सकाळी ८.३० ते रात्री १० वाजेच्या दरम्यान, फ्लॅट नं. एच/६, गोखले वृंदावन, चिंचवड, पुणे येथे घडली. फिर्यादीला एका अनोळखी व्यक्तीने व्हॉट्सअॅप कॉल करून आपण एमएनजीएल गॅस एजन्सीमधून बोलत असल्याचे सांगितले. त्यानंतर संबंधिताने फिर्यादीच्या मोबाईलवर एक लिंक पाठवून ती उघडण्यास सांगितले.
फिर्यादीने ती लिंक उघडताच त्यांच्या मोबाईल आणि बँकिंग माहितीवर सायबर गुन्हेगारांनी नियंत्रण मिळवले. तसेच ओटीपीची माहिती, क्रेडिट कार्डची संपूर्ण माहिती आणि बँक खात्यांशी संबंधित तपशील मिळवून आरोपींनी फिर्यादीचे युनियन बँक ऑफ इंडियाचे सेव्हिंग खाते, पेन्शन खाते आणि क्रेडिट कार्ड हॅक केले. त्यानंतर विविध व्यवहारांद्वारे आरोपींनी फिर्यादीच्या खात्यातून एकूण ११,३९,९९७ रुपये ५६ पैसे काढून घेत आर्थिक फसवणूक केली.
या प्रकरणी चिंचवड पोलीस ठाण्यात गुन्हा क्रमांक २६५/२०२६ नोंद करण्यात आला असून भारतीय न्याय संहिता कलम ३१९(२), ३१८(४) तसेच माहिती तंत्रज्ञान कायदा कलम ६६(सी), ६६(डी) अंतर्गत गुन्हा दाखल करण्यात आला आहे.
सायबर गुन्ह्यांचे प्रकार दिवसेंदिवस वाढत असून, गॅस एजन्सी, बँक, केवायसी अपडेट, वीजबिल किंवा मोबाईल सेवा यांच्या नावाखाली नागरिकांना लिंक पाठवून फसवले जात असल्याचे प्रकार समोर येत आहेत. त्यामुळे कोणतीही लिंक उघडण्यापूर्वी तिची खातरजमा करावी, अनोळखी व्यक्तींना ओटीपी, कार्ड तपशील किंवा बँकिंग माहिती देऊ नये, असे आवाहन पोलिसांकडून करण्यात आले आहे.
