एआय साठी जास्त रोजगार आणि गुंतवणूक भविष्यात भारतामध्ये – विवेक वेलणकर

भारतात एआय क्षेत्रात रोजगार व गुंतवणुकीच्या मोठ्या संधी; बीएससी (ऑनर्स) एआय-अँड-एमएल अभ्यासक्रम उपयुक्त

पिंपरी, दि.१६ जून २०२६ : कृत्रिम बुद्धिमत्ता (एआय) तंत्रज्ञानामुळे भविष्यात भारतात रोजगार आणि गुंतवणुकीच्या मोठ्या संधी निर्माण होणार असून, एआय व मशीन लर्निंग (एमएल) क्षेत्रातील कौशल्यांना मोठी मागणी राहणार आहे, असे प्रतिपादन करिअर मार्गदर्शक विवेक वेलणकर यांनी केले.

पुण्यातील ॲस्पायर नॉलेज अँड स्किल्स आणि डॉ. बाबासाहेब आंबेडकर टेक्नॉलॉजिकल युनिव्हर्सिटी (बाटु) यांच्या संयुक्त विद्यमाने आयोजित करिअर मार्गदर्शन मेळाव्यात ते बोलत होते. कार्यक्रमाला कुलसचिव डॉ. अमित शेष, ॲस्पायर नॉलेज अँड स्किल्सचे संस्थापक व सीईओ डॉ. संजय गांधी, डॉ. शैलेंद्र शुक्ला, मंदार हलभावी, उद्योजक मनोज देशमुख आणि प्रशांत पुंड उपस्थित होते.

विवेक वेलणकर म्हणाले की, संगणक आणि मोबाईलप्रमाणेच एआयदेखील लवकरच सर्वसामान्यांच्या जीवनाचा अविभाज्य भाग बनेल. शिक्षण, शेती, उद्योग, वैद्यकीय, वाणिज्य आणि सेवा क्षेत्रात एआयचा वापर झपाट्याने वाढणार आहे. त्यामुळे पारंपरिक कोडिंग आणि प्रोग्रामिंग क्षेत्रातील काही नोकऱ्यांवर परिणाम होऊ शकतो; मात्र एआय टूल्स विकसित करणारे, मशीन लर्निंग तज्ज्ञ आणि नव्या तंत्रज्ञानावर काम करणाऱ्या व्यावसायिकांची मागणी मोठ्या प्रमाणात वाढेल. विद्यार्थी आणि पालकांनी महाविद्यालय निवडताना कॅम्पस प्लेसमेंट व इंटर्नशिपच्या संधींना प्राधान्य द्यावे, असेही त्यांनी सांगितले.

यावेळी डॉ. अमित शेष यांनी सांगितले की, बाटु आणि ॲस्पायर नॉलेज अँड स्किल्स यांच्यात आर्टिफिशियल इंटेलिजन्स अँड मशीन लर्निंग बीएससी (ऑनर्स) या अभिनव पदवी अभ्यासक्रमासाठी सामंजस्य करार करण्यात आला आहे. विद्यार्थ्यांना शिक्षणासोबत उद्योगक्षेत्रातील अनुभव मिळावा यासाठी विद्यापीठ प्रयत्नशील आहे. विद्यापीठाच्या मार्गदर्शनाखाली आतापर्यंत ९२ स्टार्टअप्स सुरू झाले असून, राष्ट्रीय इन्क्युबेशन स्टार्टअप धोरणांतर्गत दरवर्षी २५ लाख रुपयांचा निधी राखीव ठेवण्यात आला आहे.

प्रास्ताविकात डॉ. संजय गांधी यांनी सांगितले की, राष्ट्रीय शैक्षणिक धोरणानुसार संस्था कार्यरत असून १०० हून अधिक स्टार्टअप्सना मार्गदर्शन करण्यात आले आहे. बारावीनंतरचा चार वर्षांचा आर्टिफिशियल इंटेलिजन्स अँड मशीन लर्निंग बीएससी (ऑनर्स) अभ्यासक्रम विद्यार्थ्यांना एआयसोबत क्वांटम कॉम्प्युटिंगचे ज्ञानही देणार आहे. चौथ्या वर्षात उद्योग क्षेत्रात इंटर्नशिपची संधी उपलब्ध करून देण्यात येणार असून, त्यासाठी विद्यार्थ्यांना स्टायपेंड आणि कामाचा अनुभव प्रमाणपत्रही दिले जाणार आहे. या पदवीमुळे परदेशातील उच्च शिक्षणाच्या संधीही उपलब्ध होतील, असे त्यांनी स्पष्ट केले.

कार्यक्रमाचे सूत्रसंचालन समिधा गांधी यांनी केले, तर आभार प्रदर्शन अमित गांधी यांनी केले.