हिंजवडी, दि. २७ जून : अमली पदार्थांविरोधात हिंजवडी पोलिसांनी केलेल्या धडक कारवाईत ६० ग्रॅम ब्राऊन शुगर जप्त करत एका सराईत संशयिताला अटक केली. या कारवाईत अमली पदार्थांसह मोबाईल, इलेक्ट्रॉनिक वजनकाटा, पॅकिंग साहित्य, रोख रक्कम आणि मोपेड असा एकूण १२ लाख ६६ हजार ३१० रुपयांचा मुद्देमाल हस्तगत करण्यात आला.
ही कारवाई २५ जून २०२६ रोजी रात्री सुमारे ११.४५ वाजता हिंजवडी पोलीस ठाण्याच्या हद्दीतील मधुबन चौक ते कस्तुरी चौक मार्गावरील येळवंडे कॉम्प्लेक्ससमोर, वाकड येथे करण्यात आली.
या प्रकरणी संदीप कुमार अजोधी प्रसाद (वय २७) याला अटक करण्यात आली आहे. तो मूळचा उत्तर प्रदेशातील खिरी जिल्ह्यातील कडेया गावचा असून सध्या आंबेगाव (पुणे) येथील विघ्नहर्तानगरमध्ये वास्तव्यास होता.
पोलीस शिपाई कारभारी नामदेव पालवे यांच्या फिर्यादीवरून आरोपीविरुद्ध एनडीपीएस कायद्यातील कलम ८(क) व २१(ब) अन्वये गुन्हा दाखल करण्यात आला आहे. प्राथमिक तपासात आरोपी हा ब्राऊन शुगरची बेकायदेशीर विक्री करण्याच्या उद्देशाने अमली पदार्थ बाळगत असल्याचे निष्पन्न झाले आहे.
या प्रकरणाचा पुढील तपास पोलीस उपनिरीक्षक सपना पांचाळ करीत आहेत.
