किवळे विकास नगरातील ज्येष्ठ नागरिक संघाचा उपक्रम; संगीताच्या सुरावटीत रंगला ज्येष्ठांचा गौरव सोहळा
देहूरोड, प्रतिनिधी : ज्येष्ठ नागरिक संघ, किवळे विकास नगर यांच्या कार्यालयात ५५ ज्येष्ठ नागरिकांचे वाढदिवस मोठ्या उत्साहात आणि आनंदी वातावरणात साजरे करण्यात आले. यावेळी सर्व ज्येष्ठांचा श्रीफळ, नारळ आणि टोपी देऊन सन्मान करण्यात आला.
या कार्यक्रमात शिवसेना नेते मा. बापू कातळे आणि संघाचे अध्यक्ष नानासाहेब डोईफोडे यांच्या हस्ते ज्येष्ठ नागरिकांचा गौरव करण्यात आला. उपस्थितांनी ज्येष्ठांच्या योगदानाबद्दल कृतज्ञता व्यक्त करत त्यांना निरोगी व दीर्घायुष्यासाठी शुभेच्छा दिल्या.
कार्यक्रमाचे विशेष आकर्षण ठरले ते ‘मेरी आवाज सुनो’ या संगीतमय कार्यक्रमाचे. या कार्यक्रमाचे निर्माते व संयोजक एम. डी. चौधरी आणि रवी कुलकर्णी यांच्या मार्गदर्शनाखाली सादर झालेल्या गीतांच्या मैफलीने उपस्थितांची मने जिंकली. अजय आमटे, गफूरभाई शेख, दशरथ वाघमारे, सुरेश गायकवाड, बापू देवरे आणि विजय उपासने यांनी आपल्या सुरेल गीतांमधून उपस्थितांचे मनोरंजन केले.
याप्रसंगी संघाचे सचिव पंढरीनाथ सानप, मारुती भराटे, माणिक एकड, गफूरभाई शेख, दिलीप रोकडे, विश्वास आंबेकर, गजानन ठाणे, बसवराज धोत्रे, राजेंद्र कदम, श्रीमंत शिवशरण, सुरेखा वाघ, सुरेखा ब्रम्हे, कल्पिता पळसुले यांच्यासह मोठ्या संख्येने सदस्य उपस्थित होते.कार्यक्रमामुळे ज्येष्ठ नागरिकांमध्ये उत्साहाचे वातावरण निर्माण झाले असून, सन्मान आणि सांस्कृतिक कार्यक्रमाच्या माध्यमातून त्यांना आनंददायी क्षण अनुभवता आले.
