हिंजवडी : पत्नीच्या लग्नापूर्वीच्या नावाचा वापर करून तिच्या बनावट सह्या करत तब्बल ४१ लाख २५ हजार ७८८ रुपयांचे मॉरगेज लोन घेतल्याप्रकरणी हिंजवडी पोलीस ठाण्यात फसवणुकीचा गुन्हा दाखल करण्यात आला आहे. ही घटना सप्टेंबर २०२१ ते डिसेंबर २०२१ दरम्यान अॅक्सीस बँक, हिंजवडी येथे घडली असून गुरुवारी (दि.२८ मे) दुपारी ४.१४ वाजता गुन्हा दाखल करण्यात आला.
याप्रकरणी एका महिलेने फिर्याद दिली असून संदेश शमिकांत आंत्री (रा. आंबो रेसिडन्सी, तापफिर मळा चौक, राजवाडे नगर, काळेवाडी, पुणे) यांच्याविरोधात गुन्हा दाखल करण्यात आला आहे. आरोपीस अद्याप अटक करण्यात आलेली नाही.
पोलिसांनी दिलेल्या माहितीनुसार, आरोपी हा फिर्यादी महिलेचा पती असून त्याने फिर्यादीचा विश्वासघात करत तिच्या वैयक्तिक कागदपत्रांचा गैरवापर केला. मॉरगेज लोनसाठी फिर्यादीचे लग्नापूर्वीचे ‘अस्मिता प्रकाश भागे’ हे नाव वापरून तिला कोणतीही पूर्वकल्पना न देता सह-भागीदार दाखविण्यात आले. तसेच कर्जाच्या कागदपत्रांवर बनावट सह्या करून आरोपीने स्वतःच्या फायद्यासाठी ॲक्सीस बँकेकडून फ्लॅट क्रमांक ३०१, बी-२ विंग, कृष्णा रेसिडन्सी, काळेवाडी येथील मालमत्तेवर तिघांच्या नावाने ४१ लाख २५ हजार ७८८ रुपयांचे मॉरगेज लोन घेतल्याचे समोर आले आहे.
दरम्यान, फिर्यादीने आरोपीस याबाबत जाब विचारला असता आरोपीने शिवीगाळ केल्याचेही तक्रारीत नमूद करण्यात आले आहे.या प्रकरणी हिंजवडी पोलिसांनी भारतीय दंड विधान संहितेच्या कलम ४६५, ४६८, ४७१, ४२० आणि ५०४ अन्वये गुन्हा दाखल केला असून पुढील तपास स.पो.नि वांगणेकर करीत आहेत.
