प्रसंगावधान राखत प्रवासी महिलेचे वाचविले प्राण; चालक राजेंद्र निकम आणि वाहक गोरखनाथ चव्हाण यांच्या कर्तव्यनिष्ठेचे कौतुक
पुणे प्रतिनिधी : पीएमपीएमएलच्या चालक आणि वाहकाने दाखविलेल्या तत्परतेमुळे बसमधून प्रवास करणाऱ्या एका आजारी महिलेला वेळेत वैद्यकीय मदत मिळाली. संकटाच्या प्रसंगी माणुसकीला प्राधान्य देणाऱ्या या कर्मचाऱ्यांच्या कार्याचे सर्वत्र कौतुक होत आहे.
हडपसर रेल्वे स्टेशन ते पुणे रेल्वे स्टेशनदरम्यान धावणाऱ्या ‘रात्र राणी’ बस क्रमांक ५/१ मध्ये रात्री साडेबारा वाजण्याच्या सुमारास विशाखा सुधाकर गवई यांची अचानक प्रकृती खालावली. ही बाब लक्षात येताच बसचे कायम वाहक गोरखनाथ चव्हाण (बॅच क्र. ४९७३) आणि कायम चालक राजेंद्र निकम (बॅच क्र. ४६६६) यांनी तातडीने मदतीसाठी पुढाकार घेतला.
प्रकृती गंभीर झालेल्या महिलेला त्वरित वैद्यकीय उपचार मिळावेत, या उद्देशाने चालकाने बस थेट ससून रुग्णालयाच्या आवारात नेली. तेथे डॉक्टरांच्या मदतीने महिलेला आपत्कालीन विभागात दाखल करण्यात आले. त्यानंतर वैद्यकीय पथकाच्या स्वाधीन करून तिच्या उपचारांची व्यवस्था करण्यात आली.
महिलेला रुग्णालयात दाखल केल्यानंतरही चालक आणि वाहकाने इतर प्रवाशांची जबाबदारी सांभाळली. पुढील प्रवासासाठी बस पुन्हा मार्गावर रवाना करण्यात आली.
कर्तव्यनिष्ठेसोबत माणुसकीचेही दर्शन
प्रवाशाच्या अडचणीच्या वेळी प्रसंगावधान राखून तातडीने मदत करणे, ही बाब पीएमपीएमएलच्या चालक आणि वाहकाच्या संवेदनशीलतेची साक्ष देणारी ठरली आहे. त्यांच्या या कृतीमुळे सार्वजनिक वाहतूक व्यवस्थेतील कर्मचाऱ्यांची प्रवाशांप्रती असलेली बांधिलकी अधोरेखित झाली आहे.
या उल्लेखनीय कार्याबद्दल चालक राजेंद्र निकम आणि वाहक गोरखनाथ चव्हाण यांचे अभिनंदन होत असून, त्यांच्या कर्तव्यनिष्ठेचे आणि माणुसकीचे कौतुक केले जात आहे.
