कुणाल मार्केटमधील भीषण आगीत दाखविले प्रसंगावधान; धाडस आणि समयसूचकतेचे सर्वत्र कौतुक
पिंपरी-चिंचवड : चिंचवड येथील चाफेकर चौक परिसरातील कुणाल मार्केट इमारतीच्या पार्किंगमध्ये लागलेल्या भीषण आगीत प्रसंगावधान राखून सुमारे ७० नागरिकांचे प्राण वाचविण्यात मोलाची भूमिका बजावणाऱ्या कु. आर्या विजय कांबळे (वय २०) हिचा पिंपरी-चिंचवड महानगरपालिकेच्या सर्वसाधारण सभेत विशेष सन्मान करण्यात आला. आर्याने दाखविलेल्या धाडसाचे आणि समयसूचकतेचे सर्व स्तरांतून कौतुक होत आहे.
कुणाल मार्केट इमारतीमध्ये सुमारे ४० दुकाने आणि ३८ सदनिका आहेत. पहाटे दीडच्या सुमारास इमारतीच्या पहिल्या मजल्यावर आग लागल्याचे लक्षात येताच आर्या हिने तातडीने आरडाओरडा करून इमारतीतील नागरिकांना सावध केले. नागरिकांना सुरक्षिततेसाठी टेरेसवर जाण्याचे आवाहन करत तिने अग्निशमन विभागालाही घटनेची माहिती दिली.
घटनेचे गांभीर्य ओळखून आर्याने दाखविलेल्या प्रसंगावधानामुळे नागरिकांना वेळीच सुरक्षित ठिकाणी हलविण्याची प्रक्रिया सुरू झाली. काही मिनिटांत अग्निशमन दल घटनास्थळी दाखल झाले. त्यानंतर टेरेसवर अडकलेल्या नागरिकांना शेजारील इमारतीत सुरक्षितपणे हलविण्यात आले. आर्याच्या धाडसामुळे सुमारे ७० नागरिकांचे प्राण वाचविण्यात मदत झाली.
आर्या कांबळे ही आकुर्डी येथील डी. वाय. पाटील इंटरनॅशनल युनिव्हर्सिटीमध्ये डिझाइन विषयाच्या प्रथम वर्षात शिक्षण घेत आहे. स्वतःचा जीव धोक्यात असतानाही इतरांच्या सुरक्षिततेला प्राधान्य देत तिने दाखविलेली सामाजिक बांधिलकी आणि धैर्य शहरासाठी प्रेरणादायी ठरले आहे.
महापालिकेच्या सर्वसाधारण सभेत आर्या हिचा विशेष सन्मान करून तिच्या कार्याचा गौरव करण्यात आला. यावेळी उपमहापौर शर्मिला बाबर, स्थायी समिती सभापती अभिषेक बारणे, सत्तारूढ पक्षनेते प्रशांत शितोळे, विरोधी पक्षनेते भाऊसाहेब भोईर, शिवसेना गटनेते विश्वजीत बारणे, अतिरिक्त आयुक्त डॉ. कुलदीप जंगम यांच्यासह पदाधिकारी, नगरसदस्य आणि अधिकारी उपस्थित होते. कार्यक्रमाचे सूत्रसंचालन जनसंपर्क अधिकारी प्रफुल्ल पुराणिक यांनी केले.
आर्या कांबळे हिने दाखविलेल्या धाडसी वृत्तीचा गौरव करताना महापालिकेच्या वतीने तिच्या कार्याचे कौतुक करण्यात आले. संकटाच्या प्रसंगी नागरिकांच्या मदतीला धावून जाण्याचा तिचा आदर्श शहरातील तरुणाईसाठी प्रेरणादायी ठरणार आहे.
