अवैध शस्त्र बाळगल्याप्रकरणी दोन आरोपी ताब्यात; शस्त्र पुरवणाऱ्या तिसऱ्या आरोपीविरुद्धही गुन्हा दाखल
पिंपरी-चिंचवड : पिंपरी-चिंचवड पोलिसांच्या गुन्हे शाखेतील खंडणीविरोधी पथकाने कारवाई करत रेकॉर्डवरील दोन आरोपींना ताब्यात घेतले. त्यापैकी यश अनिल शिंदे (वय २२) याच्याकडून ५० हजार रुपये किमतीची लोखंडी पिस्टल जप्त करण्यात आली. या प्रकरणी शस्त्र पुरवणाऱ्या तिसऱ्या आरोपीविरुद्धही गुन्हा दाखल करण्यात आला आहे.
पोलिसांना यश शिंदे आणि प्रज्वल सुधीर जाधव (वय २२, दोघेही रा. आंबेगाव, जि. पुणे) यांच्याकडे अवैध शस्त्र असल्याची गोपनीय माहिती मिळाली होती. त्यानुसार खंडणीविरोधी पथकाने २२ ऑक्टोबर २०२६ रोजी मध्यरात्री १२.४० च्या सुमारास नाणेकरवाडी येथील माऊली पार्कच्या कमानीजवळ, एमआयडीसी रोड परिसरात सापळा रचून दोघांना ताब्यात घेतले.
यश शिंदे याच्याकडून पिस्टल जप्त केल्यानंतर चौकशीत त्याने हे शस्त्र प्रज्वल जाधव याच्याकडून घेतल्याचे सांगितले. तर प्रज्वलने हे शस्त्र त्याचा मित्र फारूख अन्सार पठाण (वय २५, रा. बालाजीनगर, चाकण) याने दिल्याचे सांगितले. त्यानुसार तिघांविरुद्ध दक्षिण चाकण पोलीस ठाण्यात गुन्हा दाखल करण्यात आला आहे.
आरोपींविरुद्ध भारतीय न्याय संहिता २०२३ चे कलम ३(५), भारतीय हत्यार कायद्याचे कलम ३(२५) तसेच महाराष्ट्र पोलीस अधिनियमातील संबंधित कलमांनुसार कारवाई करण्यात आली आहे. ताब्यातील दोघांची वैद्यकीय तपासणी करून त्यांना जप्त मुद्देमालासह पुढील तपासासाठी दक्षिण चाकण पोलिसांच्या ताब्यात देण्यात आले. आरोपींविरुद्ध यापूर्वीही शरीराविरुद्धचे गुन्हे दाखल असल्याची माहिती पोलिसांनी दिली.
ही कारवाई पोलीस आयुक्त विनय कुमार चौबे, सहपोलीस आयुक्त डॉ. शशिकांत महावरकर, अपर पोलीस आयुक्त सारंग आवाड, पोलीस उपायुक्त रोहिदास पवार आणि सहायक पोलीस आयुक्त सचिन कदम यांच्या मार्गदर्शनाखाली खंडणीविरोधी पथकाचे वरिष्ठ पोलीस निरीक्षक राजेंद्र पाटील व त्यांच्या पथकाने केली.
