मैत्रिणीकडे शारीरिक संबंधांची मागणी; खंडणी विरोधी पथकाची कारवाई
पिंपरी प्रतिनिधी: बनावट इन्स्टाग्राम आयडीच्या माध्यमातून तरुणाला ब्लॅकमेल करून ५० हजार रुपयांची खंडणी मागणाऱ्या आणि त्याच्या मैत्रिणीकडे शारीरिक संबंधांची मागणी करणाऱ्या रेकॉर्डवरील आरोपीला पिंपरी-चिंचवड पोलिसांच्या खंडणी विरोधी पथकाने अटक केली. हनुमान सुभाष खरात (वय ३५, मूळ रा. वरुडी, ता. सिंदखेडराजा, जि. बुलढाणा) असे अटक करण्यात आलेल्या आरोपीचे नाव आहे. त्याच्याकडून मोटारसायकल, मोबाईल, पाकीट, आधारकार्ड व इतर साहित्य असा एकूण १ लाख ४ हजार १३० रुपयांचा मुद्देमाल जप्त करण्यात आला आहे.
पोलिसांनी दिलेल्या माहितीनुसार, आरोपीने ‘RuchitaNikam93’ या नावाने बनावट इन्स्टाग्राम आयडी तयार केला होता. या आयडीवरून फिर्यादीला अश्लील छायाचित्र पाठवून त्याच्याकडूनही खासगी छायाचित्र मागवण्यात आले. त्यानंतर संबंधित छायाचित्रे आणि दोघांमधील संभाषण कार्यालयीन मोबाईलवर तसेच फिर्यादीच्या पार्टटाइम नोकरीच्या ठिकाणी पाठवण्याची धमकी देण्यात आली. छायाचित्रे प्रसारित न करण्याच्या बदल्यात आरोपीने ५० हजार रुपयांची मागणी केली. पैसे न दिल्यास जीवे मारण्याची धमकीही दिल्याचे फिर्यादीत नमूद आहे.
इतकेच नव्हे, तर फिर्यादीच्या मैत्रिणीला व्हॉट्सॲपवर संदेश पाठवून फिर्यादीला त्रास होऊ द्यायचा नसेल, तर आपल्यासोबत शारीरिक संबंध ठेवावेत किंवा पैसे पाठवावेत, अशी मागणी करण्यात आली. अन्यथा फिर्यादीला मारहाण करण्याची धमकी दिल्याचेही समोर आले. तसेच, फेसबुकवरूनही धमकीवजा संदेश पाठवण्यात आले.
या प्रकरणी संत तुकारामनगर पोलीस ठाण्यात गुन्हा रजिस्टर क्रमांक ५५६/२०२६ अन्वये भारतीय न्याय संहिता २०२३ मधील कलम ३०८(३), ३५१(२) आणि ७५ नुसार गुन्हा दाखल करण्यात आला होता. त्यानंतर खंडणी विरोधी पथकाने संबंधित मोबाईल क्रमांकांचा तांत्रिक तपास करून आरोपीचा शोध घेतला. हनुमान खरात याला ताब्यात घेऊन त्याच्याकडील मुद्देमाल जप्त करण्यात आला. पुढील कारवाईसाठी आरोपी व जप्त मुद्देमाल संत तुकारामनगर पोलिसांच्या ताब्यात देण्यात आला आहे. आरोपीविरुद्ध यापूर्वीही अशाच प्रकारचे दोन गुन्हे दाखल असल्याची माहिती पोलिसांनी दिली.
ही कारवाई पोलीस आयुक्त विनय कुमार चौबे, सहपोलीस आयुक्त डॉ. शशिकांत महावरकर, अपर पोलीस आयुक्त सारंग आवाड, पोलीस उपायुक्त (गुन्हे) रोहिदास पवार आणि सहायक पोलीस आयुक्त (गुन्हे-२) सचिन कदम यांच्या मार्गदर्शनाखाली करण्यात आली. खंडणी विरोधी पथकाचे वरिष्ठ पोलीस निरीक्षक राजेंद्र पाटील, पोलीस उपनिरीक्षक अमर राऊत, रमेश गायकवाड तसेच पोलीस अंमलदारांच्या पथकाने ही कामगिरी केली.
खंडणीसंदर्भात तक्रार करण्याचे आवाहन
नागरिकांकडे कोणी खंडणीची मागणी केली असेल किंवा कोणी अशा प्रकारच्या ब्लॅकमेलिंगचा बळी ठरले असेल, तर त्यांनी खंडणी विरोधी पथक, गुन्हे शाखा किंवा संत तुकारामनगर पोलीस ठाण्याशी संपर्क साधावा, असे आवाहन पोलीस उपायुक्त रोहिदास पवार यांनी केले आहे.
