इंजिन ऑईलवर डिस्काउंट न दिल्याच्या रागातून दहशत; एमआयडीसी भोसरी पोलिसांत गुन्हा दाखल
पिंपरी-चिंचवड, दि. १९ ऑक्टोबर : मोशी येथील वाघजाई पेट्रोल पंपावर इंजिन ऑईलवर सवलत न दिल्याच्या रागातून पेट्रोल पंपावरील कर्मचाऱ्याला शिवीगाळ व धक्काबुक्की करून पिस्तूल रोखत जीवे मारण्याची धमकी दिल्याची घटना घडली. याप्रकरणी एमआयडीसी भोसरी पोलिसांनी गुन्हा दाखल केला असून, चार आरोपींना अटक करण्यात आली आहे. अन्य एका आरोपीचाही गुन्ह्यात उल्लेख आहे.
पोलिसांनी दिलेल्या माहितीनुसार, ही घटना १८ ऑक्टोबर रोजी मध्यरात्री १२.०५ वाजण्याच्या सुमारास वाघजाई पेट्रोल पंप, मोशी येथे घडली. फिर्यादी रेवन राजाराम पांढरे (वय ३३) हे पेट्रोल पंपावर वाहनांमध्ये पेट्रोल भरण्याचे काम करत होते. त्यावेळी पांढऱ्या रंगाच्या स्विफ्ट कारमधून चार जण पेट्रोल पंपावर आले. त्यापैकी दोघांनी इंजिन ऑईलची किंमत विचारली. कर्मचाऱ्याने मॅक कंपनीच्या एक लिटर ऑईलची किंमत ३६९ रुपये असल्याचे सांगितले.
सुरुवातीला किंमत जास्त असल्याचे सांगून ऑईल घेण्यास नकार देणारे हे दोघे काही वेळाने पुन्हा कर्मचाऱ्याकडे आले आणि त्यांनी एक लिटर ऑईल खरेदी केले. त्यानंतर त्यांनी सवलतीची मागणी केली; मात्र सवलत मिळणार नसल्याचे कर्मचाऱ्याने सांगितले. त्यानंतर त्यांनी यूपीआयद्वारे ३६९ रुपये भरले.
डिस्काउंट न मिळाल्याने पिस्तूल रोखले
सवलत न दिल्याचा राग मनात धरून आरोपींनी कर्मचाऱ्याला शिवीगाळ करत धक्काबुक्की केली. ‘तुला पाहून घेतो, मी देवा जमादार आहे, मला ओळखत नाही का? तुला मारूनच टाकतो,’ अशी धमकी देत एका आरोपीने कमरेला लावलेले पिस्तूल काढून कर्मचाऱ्याच्या दिशेने रोखले. त्यामुळे पेट्रोल पंपावर दहशतीचे वातावरण निर्माण झाले. परिसरात जमलेले ग्राहकही घाबरून पळून गेले. त्यानंतर आरोपी पांढऱ्या रंगाच्या स्विफ्ट कारमधून (एमएच १२ क्यूडब्ल्यू ०२८९) घटनास्थळावरून पसार झाले.
या प्रकरणी एमआयडीसी भोसरी पोलीस ठाण्यात भारतीय न्याय संहितेच्या संबंधित कलमांसह भारतीय हत्यार कायदा आणि महाराष्ट्र पोलीस अधिनियमातील तरतुदींनुसार गुन्हा क्रमांक ८४४/२०२६ दाखल करण्यात आला आहे. पोलिसांनी देवानंद ऊर्फ देवा भिमाशंकर जमादार (वय २९), सुलतान इसुफ खान (वय ३२), विलास धाऊ ढेबे (वय २९) आणि काशिनाथ कल्याण काळे (वय २८) या चार आरोपींना अटक केल्याची नोंद आहे. कुणाल साहेबराव रणवीर (वय अंदाजे २२) याचाही आरोपी म्हणून उल्लेख आहे.या प्रकरणाचा पुढील तपास सहाय्यक पोलीस निरीक्षक पाटील करीत आहेत.
