नगरसेविका स्वप्नाली पंडित यांची तत्परता; गणपती चौकातील रेलिंग पुन्हा बसवले
व्यापाऱ्यांची तक्रार अन् तातडीने कार्यवाही; ‘एक कॉल, प्रॉब्लेम सॉल्व्ह’चा प्रत्यय
पुणे | प्रतिनिधी….‘एक कॉल, प्रॉब्लेम सॉल्व्ह’ या उक्तीचा प्रत्यय पुण्यातील तुळशीबाग परिसरात आला. लक्ष्मी रस्त्यावरील गणपती चौकातील पदपथावर काढण्यात आलेले रेलिंग गणेशोत्सव संपल्यानंतरही १५ ते २० दिवस उलटून गेले, तरी पुन्हा बसविण्यात आले नव्हते. स्थानिक व्यापाऱ्यांनी नगरसेविका सौ. स्वप्नाली नितीन पंडित यांच्याशी संपर्क साधताच त्यांनी तातडीने दखल घेत महापालिका प्रशासनाला सूचना दिल्या. त्यानंतर रेलिंग पुन्हा बसविण्याचे काम पूर्ण झाले.
गणेशोत्सवाच्या काळात गणेशभक्तांना सहजपणे ये-जा करता यावी आणि वाहतुकीला अडथळा निर्माण होऊ नये, यासाठी पुणे महानगरपालिकेच्या वतीने लक्ष्मी रस्त्यावरील गणपती चौकातील पदपथावरील रेलिंग तात्पुरत्या स्वरूपात काढण्यात आले होते. मात्र, उत्सव संपल्यानंतरही रेलिंग पूर्ववत न केल्याने परिसरातील व्यापाऱ्यांना आणि नागरिकांना गैरसोयीचा सामना करावा लागत होता.
अखेर स्थानिक व्यापाऱ्यांनी नगरसेविका स्वप्नाली पंडित यांना फोन करून ही समस्या निदर्शनास आणून दिली. त्यांनी विलंब न करता संबंधित प्रशासनाला रेलिंग पुन्हा बसविण्याच्या सूचना दिल्या. त्यांच्या पाठपुराव्यामुळे कामाला गती मिळाली आणि रेलिंग पूर्ववत बसविण्यात आले.
लोकप्रतिनिधींची तत्परता, व्यापाऱ्यांकडून समाधान!
नागरिकांच्या समस्या ऐकून घेणे, त्यांची तातडीने दखल घेणे आणि संबंधित यंत्रणेकडून काम पूर्ण करून घेणे, ही लोकप्रतिनिधींच्या कार्यक्षमतेची महत्त्वाची कसोटी असते. स्वप्नाली पंडित यांनी एका फोनवर समस्येची दखल घेतल्याने स्थानिक व्यापाऱ्यांनी समाधान व्यक्त केले आणि त्यांचे आभार मानले.
नागरिकांचा एक फोन, लोकप्रतिनिधींची तत्परता आणि समस्येचे निराकरण, अशा या छोट्याशा घटनेतून जनसंपर्काचे महत्त्व अधोरेखित झाले आहे.
