चिखली पोलिसांची धडाकेबाज कामगिरी; ५७.८७ लाखांचा मुद्देमाल जप्त, ७० हून अधिक सीसीटीव्ही फुटेजची तपासणी
पिंपरी-चिंचवड : तळवडे येथील ज्योतीबानगर परिसरात ६० वर्षीय महिलेचे हातपाय बांधून, चाकूचा धाक दाखवत मारहाण करून घरातील सोन्याचे दागिने, रोख रक्कम व अन्य ऐवज लुटणाऱ्या तिघांना चिखली पोलिसांच्या गुन्हे तपास पथकाने अवघ्या आठ तासांत अटक केली. आरोपींकडून अंदाजे ७३ तोळे वजनाचे सोन्याचे दागिने, चांदीची पैंजणे, गुन्ह्यात वापरलेली मोटारसायकल व हत्यारे असा एकूण ५७ लाख ८७ हजार ४०० रुपयांचा मुद्देमाल जप्त करण्यात आला आहे.
ही घटना १३ ऑक्टोबर २०२६ रोजी रात्री एक ते सव्वा एकच्या सुमारास घडली. भारती मारुती भालेकर (वय ६०, रा. ज्योतीबानगर, तळवडे) या घरात झोपलेल्या असताना तीन अनोळखी व्यक्तींनी हॉलच्या दरवाजाचे कुलूप तोडून घरात प्रवेश केला. त्यानंतर आरोपींनी भालेकर यांचे हातपाय बांधले, त्यांच्या तोंडावर साड्या टाकल्या आणि मारहाण करत चाकूचा धाक दाखविला. त्यानंतर घरातील सोन्याचे दागिने, रोख रक्कम, चांदीची पैंजणे, मोबाईल आणि घड्याळ असा ऐवज घेऊन आरोपी पसार झाले.
या प्रकरणी चिखली पोलीस ठाण्यात गुन्हा रजिस्टर क्रमांक ८१९/२०२६ अन्वये भारतीय न्याय संहितेच्या कलम १२६(२), ३११, ३३१(४) आणि ३(५) नुसार गुन्हा दाखल करण्यात आला होता.
७० हून अधिक सीसीटीव्ही फुटेजची तपासणी
गुन्ह्याचे गांभीर्य लक्षात घेऊन पोलिसांनी तपासाची चक्रे वेगाने फिरवली. पोलीस निरीक्षक (गुन्हे) अमोल फडतरे यांच्या मार्गदर्शनाखाली तपास पथकाने परिसरातील ७० हून अधिक सीसीटीव्ही कॅमेऱ्यांमधील फुटेज तपासले. तसेच गोपनीय माहितीच्या आधारे संशयितांचा माग काढण्यात आला.
या तपासातून अनारुल्ला मजहरउल्ला चौधरी (वय ३६, रा. चिखली), अब्दुल रहिम मजिद मोमीन (वय ३९, रा. कांदिवली, मुंबई) आणि समिउल्ला अजमतउल्ला खान (वय ३२, रा. मुंब्रा, ठाणे) यांची ओळख पटवून त्यांना ताब्यात घेण्यात आले. पोलिसांच्या तपासादरम्यान आरोपींनी गुन्ह्यातील सहभागाची कबुली दिल्याचे पोलिसांनी सांगितले.
७३ तोळे सोन्याचे दागिने हस्तगत
आरोपींनी लपवून ठेवलेले अंदाजे ७३ तोळे वजनाचे सोन्याचे दागिने, चांदीच्या तीन जोड पैंजणांसह गुन्ह्यात वापरलेली मोटारसायकल व हत्यारे पोलिसांनी जप्त केली. जप्त मुद्देमालाची एकूण किंमत अंदाजे ५७ लाख ८७ हजार ४०० रुपये असल्याचे पोलिसांनी नमूद केले आहे.
ही कामगिरी पोलीस आयुक्त विनयकुमार चौबे, पोलीस सहआयुक्त डॉ. शशिकांत महावरकर, अपर पोलीस आयुक्त बसवराज तेली, अपर पोलीस आयुक्त (गुन्हे) सारंग आवाड, पोलीस उपायुक्त श्वेता खेडकर आणि सहायक पोलीस आयुक्त प्रविण मोरे यांच्या मार्गदर्शनाखाली करण्यात आली.
चिखली पोलीस ठाण्याचे वरिष्ठ पोलीस निरीक्षक रणजित जाधव, पोलीस निरीक्षक (गुन्हे) अमोल फडतरे, सहायक पोलीस निरीक्षक सुभाष चव्हाण तसेच पोलीस अंमलदार किरण काटकर, विनोद व्होनमाने, कंठव्या स्वामी, प्रविण भोमाळे, सूरज सुतार, अरुण साबळे, संतोष भालेराव, अजय गायकवाड, भरत माने, नवनाथ कुन्हे, अनिल राक्षे आणि संतोष भोर यांनी या कारवाईत सहभाग घेतला.
