बनावट ट्रेडिंग अ‍ॅपद्वारे ज्येष्ठ नागरिकाला ८६ लाखांचा गंडा; सहा आरोपी अटकेत
कंबोडियातील मुख्य आरोपीशी संपर्क; २८ लाख रुपये परत मिळण्याचा मार्ग मोकळा
पिंपरी, दि. १६ ऑक्टोबर : बनावट ट्रेडिंग अ‍ॅपद्वारे शेअर बाजारात गुंतवणुकीचे आमिष दाखवून ज्येष्ठ नागरिकाची ८६ लाख रुपयांची फसवणूक करणाऱ्या संघटित सायबर गुन्हेगारी टोळीवर पिंपरी-चिंचवड पोलिसांनी महाराष्ट्र संघटित गुन्हेगारी नियंत्रण अधिनियम (मकोका) अंतर्गत कारवाई केली आहे. सन २०२६ मधील सायबर गुन्हेगारांविरोधातील ही दुसरी मकोका कारवाई असून, या प्रकरणात सहा आरोपींना अटक करण्यात आली आहे. फसवणुकीच्या रकमेपैकी गोठवलेले २८ लाख रुपये तक्रारदाराला परत मिळण्यासाठी न्यायालयाचे आदेश प्राप्त झाले आहेत.
पिंपरी-चिंचवड सायबर पोलीस ठाण्यात १७ जुलै २०२६ रोजी याप्रकरणी गुन्हा दाखल करण्यात आला होता. आरोपींनी सोशल मीडियाच्या माध्यमातून शेअर बाजारात गुंतवणूक केल्यास मोठा परतावा मिळेल, असे आमिष दाखवून ज्येष्ठ नागरिकाची आर्थिक फसवणूक केली. फसवणुकीची रक्कम विविध बँक खात्यांमध्ये वर्ग करण्यात आली होती. तपासादरम्यान या खात्यांतील काही रक्कम गोठविण्यात आली.
तपासादरम्यान पोलिसांनी तेजस ज्ञानोबा लोखंडे (२४), अविनाश ज्ञानोबा बाकलिकर (२८), हर्षल दिलीप बोरा (३४), सोनू हरिष शर्मा (२१), अ‍ॅलेक ऊर्फ गौरव रमेश गाडगे (२४) आणि आखील श्रीनिवासराव नेल्लुरी (२४) या सहा आरोपींना अटक केली. पुणे, लातूर, अहिल्यानगर, नवी मुंबई आणि हैदराबाद येथे तपास करून ही कारवाई करण्यात आली. या गुन्ह्यातील अन्य आरोपींचा शोध सुरू आहे.
अटक केलेले आरोपी कंबोडियातील मुख्य आरोपीच्या संपर्कात राहून सायबर गुन्हे करीत असल्याचे तपासात निष्पन्न झाले आहे. आरोपींनी संघटित टोळी तयार करून आर्थिक फायद्यासाठी नागरिकांना गुंतवणुकीचे आमिष दाखविले. फसवणुकीतून मिळालेली रक्कम यूएसडीटीसारख्या आभासी चलनात वर्ग करण्यात आल्याचेही पोलिसांनी सांगितले.
या टोळीशी संबंधित आरोपींनी पिंपरी-चिंचवड, पुणे, नाशिक, छत्रपती संभाजीनगर तसेच गुजरातमध्ये फसवणूक, अपहरण, खंडणी, दरोडा, अमली पदार्थांची तस्करी आणि बनावट कागदपत्रे तयार करण्यासारखे गुन्हे केल्याचे तपासात समोर आले आहे. संघटितपणे सायबर फसवणूक करून आर्थिक फायदा मिळविण्याच्या उद्देशाने गुन्हे केल्याचे निष्पन्न झाल्यानंतर मकोका अंतर्गत कारवाई करण्यात आली
अपर पोलीस आयुक्त (गुन्हे) सारंग आवाड यांनी महाराष्ट्र संघटित गुन्हेगारी नियंत्रण अधिनियम १९९९ च्या कलम ३(१)(ii) आणि ३(४) चा समावेश करण्याचे आदेश दिले आहेत. या गुन्ह्याचा तपास सहायक पोलीस आयुक्त (सायबर व आर्थिक गुन्हे) रोहिणी बानकर करीत आहेत.
सदर कारवाई पोलीस आयुक्त विनय कुमार चौबे, पोलीस सहआयुक्त डॉ. शशिकांत महावरकर, अपर पोलीस आयुक्त सारंग आवाड, अपर पोलीस आयुक्त (प्रादेशिक विभाग) बसवराज तेली, पोलीस उपायुक्त रोहिदास पवार आणि सहायक पोलीस आयुक्त रोहिणी बानकर यांच्या मार्गदर्शनाखाली सायबर पोलीस ठाणे व गुन्हे शाखेच्या पथकाने केली आहे.
