पिंपळे गुरव : वर्षभर शेतात काबाडकष्ट करून शेतकऱ्यांच्या शेतीकामात मोलाची मदत करणाऱ्या बैलांप्रति आदर, प्रेम आणि कृतज्ञता व्यक्त करण्याचा सण म्हणजे बैलपोळा. या दिवशी बैलांना अंघोळ घालून, त्यांच्या शिंगांना रंग लावून, बाशिंग बांधून आणि अंगावर रंगीबेरंगी झुली घालून वाजतगाजत मिरवणूक काढली जाते. तसेच त्यांना पुरणपोळीचा नैवेद्य खाऊ घालून त्यांच्याविषयी कृतज्ञता व्यक्त केली जाते, अशी भावना पिंपळे गुरव येथील प्रगतिशील शेतकरी पै. नरेश जगताप यांनी व्यक्त केली.
यावेळी नरेश जगताप म्हणाले की, “आमच्या बैलजोडीला संतश्रेष्ठ श्री ज्ञानेश्वर महाराज यांच्या पालखी सोहळ्यात मान मिळाला आहे. हे आमच्या संपूर्ण कुटुंबासाठी अत्यंत अभिमानाची आणि भाग्याची गोष्ट आहे. मात्र, आज शहरांमध्ये वाढत चाललेल्या सिमेंटच्या जंगलामुळे पशुधन पाळणे दिवसेंदिवस कठीण होत आहे. जनावरांना सांभाळण्यासाठी पुरेशी जागाही उपलब्ध होत नाही.
“आम्ही आज जे काही आहोत, त्यामध्ये बैलांचे मोठे योगदान आहे, याची आम्हाला जाणीव आहे. त्यामुळे त्यांच्याप्रति कृतज्ञता व्यक्त करण्यासाठी आम्ही वर्षभर त्यांच्याकडून कोणतेही काम न घेता केवळ हौसेने त्यांचा सांभाळ करतो. घरातील महिला आणि मुलेही बैलांची काळजी घेतात. आमची नातवंडे स्वतः बैलांना धरतात. त्यामुळे बैल आणि आमच्या कुटुंबातील सदस्य यांच्यात घट्ट भावनिक नाते निर्माण झाले आहे. या जिव्हाळ्यामुळेच त्यांना विकण्याचा विचारही आम्ही करू शकत नाही. मात्र, शहरातील जागेची कमतरता आणि इतर अडचणींमुळे त्यांचा सांभाळ करणे कठीण होत असल्याची खंत आहे,”
……पै.नरेश जगताप.
बैलपोळ्याच्या निमित्ताने बैलांप्रति असलेले प्रेम, जिव्हाळा आणि कृतज्ञतेची भावना जगताप कुटुंबीयांनी जपली आहे. परंपरा, शेतीसंस्कृती आणि पशुधनाशी असलेले भावनिक नाते आजही टिकवून ठेवण्याचा त्यांचा प्रयत्न आहे.
यावेळी नरेश जगताप, सौरभ जगताप, कुनाल जगताप, गौरव जगताप, ओंमकार जगताप, सुमित जगताप, दत्ता जगताप, श्वेता जगताप, वृशाली जगताप यांच्यासह जगताप कुटुंबातील सदस्य उपस्थित होते.
