राज्यपालांच्या हस्ते १०३ पोलीस अधिकारी, अंमलदारांना राष्ट्रपती पोलीस पदक प्रदान
मुंबई, प्रतिनिधी : राज्यपाल जिष्णु देव वर्मा यांच्या हस्ते लोकभवन येथे झालेल्या पोलीस अलंकरण सोहळ्यामध्ये १०३ पोलीस अधिकारी व अंमलदारांना राष्ट्रपतींनी जाहीर केलेली पोलीस शौर्य पदक, शौर्य पदक, उल्लेखनीय सेवेबद्दल राष्ट्रपती पोलीस पदक तसेच गुणवत्तापूर्ण सेवेसाठी पोलीस पदक समारंभपूर्वक प्रदान करण्यात आले.
अलंकरण सोहळ्यामध्ये २०२२ व २०२३ या वर्षांच्या स्वातंत्र्य दिनानिमित्त तसेच २०२३ व २०२४ या वर्षांच्या प्रजासत्ताक दिनानिमित्त जाहीर झालेली पोलीस पदके प्रदान करण्यात आली.
यावेळी २ पोलीस अधिकारी व अंमलदारांना पोलीस शौर्य पदक (पीएमजी), १८ जणांना शौर्य पदक (जीएम), ३ अधिकाऱ्यांना राष्ट्रपती यांचे उल्लेखनीय सेवेचे पोलीस पदक (पीपीएम), ४ अधिकारी व अंमलदारांना राष्ट्रपती यांचे गुणवत्तापूर्ण सेवेचे पदक (पीएसएम), ४० अधिकारी व अंमलदारांना पोलीस पदक (PM) व ३६ जणांना गुणवत्तापूर्ण सेवेचे पदक (एमएसएम) प्रदान करण्यात आले.
या अलंकरण सोहळ्यामध्ये मीरा भायंदर वसई विरारचे पोलीस आयुक्त निकेत कौशिक, पिंपरी चिंचवडचे पोलीस आयुक्त विनय कुमार चौबे, अपर पोलीस महासंचालक (वाहतूक) प्रविण साळुंके, अपर पोलीस महासंचालक (प्रशासन) मधुकर पाण्डेय, विशेष पोलीस महानिरीक्षक (व्हीआयपी सुरक्षा) प्रविण कुमार पडवळ व विशेष पोलीस महानिरीक्षक (प्रशिक्षण व खास पथके) निशिथ मिश्र या अलंकृत अधिकाऱ्यांचा समावेश होता.
अलंकरण सोहळ्याला गृह राज्यमंत्री (ग्रामीण) डॉ पंकज भोयर, अतिरिक्त मुख्य सचिव (गृह) मनिषा म्हैसकर, पोलीस महासंचालक सदानंद दाते, अतिरिक्त पोलीस महासंचालक (एटीएस) नवल बजाज, पोलीस अधिकारी, सन्मानित पोलीस अधिकारी व अंमलदार तसेच त्यांचे कुटुंबीय उपस्थित होते.
पोलीस अलंकरण सोहळ्याची सुरुवात राष्ट्रीय गीत, राष्ट्रगीत व राज्यगीताने झाली तसेच सांगता राष्ट्रीय गीत व राष्ट्रगीताने झाली.अलंकृत करण्यात आलेल्या पोलीस अधिकारी व अंमलदारांची यादी सोबत जोडली आहे.
