तळेगाव-मावळ परिसरात होती दहशत; १३ गंभीर गुन्हे दाखल
पिंपरी, दि. ८ ऑक्टोबर २०२६ : पिंपरी-चिंचवड पोलीस आयुक्तालयाच्या अभिलेखावरील गेल्या चार वर्षांपासून फरार असलेल्या कुख्यात आरोपीला गुन्हे शाखा, युनिट-४च्या पथकाने जांभुळगाव येथून शिताफीने ताब्यात घेतले. नारायण सोपान दाभाडे (वय ४१, रा. जांभुळगाव, व्हिजन सिटी, फ्लॅट नं. ३०४, ता. मावळ, जि. पुणे) असे अटक करण्यात आलेल्या आरोपीचे नाव आहे.
उत्तर म्हाळुंगे पोलीस ठाण्यात दाखल असलेल्या गुन्हा रजिस्टर क्रमांक ५९६/२०२३ मध्ये भारतीय दंड विधानाच्या कलम ३०७, ३२६, ३२३, ५०४, ५०६ व ३४ अन्वये आरोपीविरुद्ध गुन्हा दाखल आहे. या गंभीर गुन्ह्यात तो गेल्या चार वर्षांपासून पोलिसांना हवा होता.
नारायण दाभाडे याच्यावर यापूर्वी मोक्का, खुनाचा प्रयत्न, दुखापत, खंडणी, अपहरण, मारामारी, अग्निशस्त्राचा वापर, ज्वेलर्स लुटण्याचा कट, दरोड्याचा प्रयत्न आणि गांजा विक्री यांसारखे एकूण १३ गंभीर गुन्हे दाखल असल्याची माहिती पोलिसांनी दिली. तळेगाव दाभाडे व मावळ परिसरात त्याची दहशत असल्याचेही पोलिसांकडून सांगण्यात आले.
वरिष्ठ अधिकाऱ्यांनी दिलेल्या सूचनेनुसार पिंपरी-चिंचवड आयुक्तालयातील पाहिजे व फरारी आरोपींचा शोध घेण्याची मोहीम सुरू करण्यात आली होती. त्याअंतर्गत गुन्हे शाखा युनिट-४च्या पथकाने आरोपीचा तांत्रिक विश्लेषणाच्या आधारे शोध घेतला. तसेच गोपनीय बातमीदारामार्फत मिळालेल्या माहितीच्या आधारे जांभुळगाव येथे सापळा रचून आरोपी नारायण दाभाडे याला ताब्यात घेतले.
ताब्यात घेतलेल्या आरोपीला पुढील कायदेशीर कारवाईसाठी उत्तर म्हाळुंगे पोलीस ठाण्याच्या ताब्यात देण्यात आले आहे.
ही कारवाई पोलीस आयुक्त विनयकुमार चौबे, पोलीस सह आयुक्त डॉ. शशिकांत महावरकर, अपर पोलीस आयुक्त (गुन्हे) सारंग आवाड, पोलीस उप आयुक्त (गुन्हे) रोहिदास पवार आणि सहायक पोलीस आयुक्त (गुन्हे-१) डॉ. सुदर्शन राठोड यांच्या मार्गदर्शनाखाली वरिष्ठ पोलीस निरीक्षक अर्जुन घोडेपाटील, सहायक पोलीस निरीक्षक श्रीधर भोसले, पोलीस हवालदार असवले, पोलीस हवालदार सोनटक्के आणि पोलीस शिपाई मुंडे यांच्या पथकाने केली.
