पाच वाहने, स्पेअरपार्टसह २ लाख ६५ हजारांचा मुद्देमाल जप्त
पिंपरी : मोटारसायकलींची चोरी करून त्यांचे स्पेअरपार्ट वेगवेगळे करून भंगार दुकानदारांना विक्री करणाऱ्या टोळीचा बावधन पोलिसांनी पर्दाफाश केला आहे. या कारवाईत दोन आरोपींसह एका विधिसंघर्षित बालकाला ताब्यात घेण्यात आले असून, त्यांच्याकडून पाच मोटारसायकली व विविध वाहनांचे स्पेअरपार्ट असा एकूण २ लाख ६५ हजार रुपये किमतीचा मुद्देमाल जप्त करण्यात आला आहे.
दि. ७ सप्टेंबर रोजी सकाळी ११.३० ते ११ सप्टेंबर रोजी रात्री ८ वाजण्याच्या दरम्यान बाणेर येथील रोहन लेअर सोसायटी परिसरातून फिर्यादीची यामाहा एमटी-१५ (एमएच-१३-ईडब्ल्यू-५८४७) मोटारसायकल चोरीस गेली होती. याप्रकरणी बावधन पोलीस ठाण्यात गुन्हा क्रमांक ४४६/२०२६, भारतीय न्याय संहिता कलम ३०३(२) अन्वये गुन्हा दाखल करण्यात आला होता.
गुन्ह्याचा तपास करताना वरिष्ठ पोलीस निरीक्षक अरविंद पवार यांच्या सूचनेनुसार पोलीस उपनिरीक्षक सारंग ठाकरे यांच्या नेतृत्वाखाली तपास पथकाने चोरट्यांचा शोध सुरू केला. पथकातील पोलिसांनी तब्बल ९० ते १०० सीसीटीव्ही फुटेजची पाहणी करून चोरीच्या मोटारसायकलींचा माग काढला. तपासादरम्यान चोरटे मोटारसायकल घेऊन इंगवले चौक, पिंपळे निलख येथे गेल्याचे निष्पन्न झाले.
त्यानंतर पोलिसांनी इंगवले चौक परिसरात शोध घेतला असता हॉटेल जगदंबाच्या मागे ऋषीकेश शहाजी साठे याचे फॅब्रिकेशनचे दुकान असल्याचे आढळले. या दुकानात चोरीच्या मोटारसायकलींचे वेगवेगळे स्पेअरपार्ट करून ते भंगार दुकानदारांना विक्री केल्याचे तपासात समोर आले. पोलिसांनी दुकानातून पाच मोटारसायकली तसेच विविध मोटारसायकलींचे स्पेअरपार्ट जप्त केले.
या प्रकरणात पवन मरीआप्पा भज्जी (वय २५, रा. औंध, पुणे), ऋषीकेश शहाजी साठे (वय २९, रा. पिंपळे निलख, पुणे) यांच्यासह एका विधिसंघर्षित बालकाला ताब्यात घेण्यात आले आहे. आरोपी ऋषीकेश साठे याच्याविरुद्ध वाकड पोलीस ठाण्यात यापूर्वीही गुन्हा दाखल असल्याची माहिती पोलिसांनी दिली.
या प्रकरणाचा पुढील तपास पोलीस हवालदार फारुक मुल्ला करीत आहेत.
ही कारवाई पोलीस आयुक्त विनयकुमार चौबे, पोलीस सहआयुक्त डॉ. शशिकांत महावरकर, अपर पोलीस आयुक्त बसवराज तेली, अपर पोलीस आयुक्त (गुन्हे) सारंग आवाड, पोलीस उपआयुक्त प्रदीप जाधव आणि सहायक पोलीस आयुक्त विठ्ठल कुबडे यांच्या मार्गदर्शनाखाली करण्यात आली.
कारवाईत बावधन पोलीस ठाण्याचे वरिष्ठ पोलीस निरीक्षक अरविंद पवार, पोलीस निरीक्षक (गुन्हे) परवेज शिकलगार, पोलीस उपनिरीक्षक सारंग ठाकरे, श्रेणी पोलीस उपनिरीक्षक राजेंद्र काळे तसेच गुन्हे प्रकटीकरण पथकातील अधिकारी व अंमलदार सहभागी झाले.
