पुणे/सासवड प्रतिनिधी…पुरंदर तहसील कार्यालयातील वडिलोपार्जित जमिनीच्या प्रकरणातील आदेश लवकर मिळवून देण्यासाठी २५ हजार रुपयांची लाच स्वीकारताना एकाला पुणे लाचलुचपत प्रतिबंधक विभागाच्या पथकाने रंगेहाथ पकडले. ही कारवाई बुधवार, २ सप्टेंबर २०२६ रोजी सासवड येथे करण्यात आली.
तक्रारदार यांच्या वडिलोपार्जित जमिनीच्या गट क्रमांक ७६९ मधील असमान हिस्साच्या सुनावणीचे प्रकरण पुरंदर तहसीलदारांच्या न्यायालयात सुरू होते. २४ जून रोजी तहसीलदारांनी वादी व प्रतिवादींना समान संधी देऊन प्रकरण बंद केले होते. मात्र, संबंधित आदेश अद्याप प्राप्त झाला नव्हता.
आदेशाबाबत चौकशी करण्यासाठी तक्रारदार २९ ऑगस्ट रोजी तहसील कार्यालयात गेले असता त्यांची भेट क्लार्क विजय खळदकर याच्याशी झाली. प्रकरण तहसीलदारांसमोर ठेवण्यासाठी सुरुवातीला ५ हजार रुपयांची लाच मागितल्याचा आरोप तक्रारीत करण्यात आला.
एसीबीने तक्रारीची पडताळणी केली असता, सुनावणीचा आदेश तहसीलदारांकडून प्राप्त करून देण्यासाठी २५ हजार रुपयांची लाच मागितल्याचे निष्पन्न झाले. त्यानंतर पुणे एसीबी पथकाने सापळा रचला. सासवड येथील तहसीलदार कार्यालयासमोरील रोहित हॉटेलजवळ पंचांसमक्ष २५ हजार रुपये स्वीकारताना खळदकर याला पकडण्यात आले.
कारवाईनंतर हा शासकीय कर्मचारी नसून खासगी इसम असल्याचे एसीबीकडून स्पष्ट करण्यात आले आहे. त्याला २ सप्टेंबर रोजी दुपारी २.०१ वाजता ताब्यात घेण्यात आले. या प्रकरणी भ्रष्टाचार प्रतिबंध अधिनियम, १९८८ मधील कलम ७(अ) अन्वये सासवड पोलीस ठाणे, पुणे ग्रामीण येथे गुन्हा दाखल करण्याची प्रक्रिया सुरू आहे.
ही सापळा कारवाई पोलीस निरीक्षक अविनाश घरबुडे यांच्या नेतृत्वाखाली, पोलीस उपअधीक्षक सतीश वाळके यांच्या पर्यवेक्षणाखाली करण्यात आली. पोलीस हवालदार बाळासाहेब गदादे, दीपक काकडे आणि पोलीस कॉन्स्टेबल रवी दिवेकर यांच्या पथकाने कारवाईत सहभाग घेतला.
एसीबीचे पोलीस अधीक्षक शिरीष सरदेशपांडे आणि अपर पोलीस अधीक्षक-१ अजित पाटील यांचे या कारवाईस मार्गदर्शन लाभले.
