सुमारे दीड लाखांची लाच स्वीकारल्याची प्राथमिक माहिती; सांगवी पोलिस ठाण्यात गुन्हा दाखल करण्याची प्रक्रिया सुरू
पिंपरी-चिंचवड,/सांगवी : पिंपरी-चिंचवड महानगरपालिकेच्या सांगवी विभागीय कार्यालयातील करसंकलन विभागात लाचलुचपत प्रतिबंधक विभागाने (ACB) गुरुवारी कारवाई केली. या कारवाईत करसंकलन विभागातील लिपिक कर्मचारी उमेश कुटे यांना लाच स्वीकारताना रंगेहात पकडण्यात आल्याची माहिती समोर आली आहे.
प्राथमिक माहितीनुसार, संबंधित कर्मचाऱ्याने एका कामासाठी लाचेची मागणी केल्याचे समजते. ही लाच स्वीकारताना ACBच्या पथकाने सापळा रचून कारवाई केल्याचे सांगण्यात येत आहे. सुमारे दीड लाख रुपयांची लाच स्वीकारताना ही कारवाई झाल्याची प्राथमिक माहिती मिळत असली, तरी लाचेची नेमकी रक्कम आणि ती कोणत्या कामासाठी मागण्यात आली होती, याबाबत ACBकडून अधिकृत माहिती अद्याप जाहीर झालेली नाही.
कारवाईनंतर संबंधित कर्मचाऱ्याविरोधात सांगवी पोलीस ठाण्यात गुन्हा दाखल करण्याची प्रक्रिया सुरू असल्याची माहिती मिळत आहे. या प्रकरणाचा पुढील तपास लाचलुचपत प्रतिबंधक विभागाकडून सुरू असून, ACBच्या अधिकृत निवेदनानंतर कारवाईतील नेमका तपशील स्पष्ट होणार आहे.
