वडिलांच्या बचावासाठी १२ वर्षीय मानवीचा चोरट्यावर प्रतिहल्ला; आईने हिसकावले रिव्हॉल्व्हर, मायलेकींच्या धाडसाचे कौतुक
पुणे ग्रा./शिरूर, दि. १७ : शिरूर शहरातील रामलिंग रोड परिसरातील आनंद सोसायटीमध्ये सशस्त्र चोरट्याने धुमाकूळ घालत गोळीबार केला. जबरी चोरीला विरोध करणारे व्यापारी उमेश छाजेड यांच्या पायावर चोरट्याने गोळी झाडली. या हल्ल्यात उमेश छाजेड गंभीर जखमी झाले, तर त्यांची १२ वर्षीय मुलगी मानवी किरकोळ जखमी झाली. वडिलांच्या बचावासाठी मानवीने चोरट्यावर जोरदार प्रतिहल्ला केला, तर आई प्रिया छाजेड यांनी चोराच्या हातातील रिव्हॉल्व्हर हिसकावून घेतले. मायलेकींच्या धाडसामुळे चोरट्याला पळ काढावा लागला. या थरारक घटनेमुळे शिरूर शहरात खळबळ उडाली आहे.
पहाटे चार ते साडेचारच्या सुमारास ही घटना घडली. संबंधित चोरटा रात्री दोन वाजल्यापासून आनंद सोसायटी परिसरात फिरून घरांची पाहणी करत होता. त्याने शेजारील सोसायटीतही चोरीचा प्रयत्न केल्याची माहिती समोर आली आहे. त्यानंतर त्याने प्रथम ओस्तवाल यांच्या घरात चोरी केली आणि पुढे उमेश छाजेड यांच्या घरात प्रवेश केला.
उमेश छाजेड हे कुत्र्याला फिरवण्यासाठी बाहेर गेले होते. घरी परतल्यानंतर त्यांना घराचा दरवाजा उघडा दिसला. त्यांनी आत जाऊन पाहिले असता, हातात रिव्हॉल्व्हर घेतलेला चोरटा दिसला. उमेश यांनी त्याला विरोध केल्याने दोघांमध्ये झटापट सुरू झाली. आवाज ऐकून पत्नी प्रिया आणि मुलगी मानवी घटनास्थळी धावून आल्या.
वडिलांवर चोरटा हल्ला करत असल्याचे पाहताच मानवीने धाडसाने त्याच्यावर प्रतिहल्ला केला. याचवेळी चोरट्याने उमेश यांच्या पायावर गोळी झाडली. गोळी पायातून आरपार गेल्याने ते गंभीर जखमी झाले. पती जखमी होऊन पडलेले असतानाही प्रिया यांनी प्रसंगावधान राखत चोरट्याच्या हातातील रिव्हॉल्व्हर हिसकावून घेतले. मानवीचा प्रतिकार सुरूच असल्याने चोरट्याने स्वतःची सुटका करून घेत अंधाराचा फायदा घेत पळ काढला.
घटनेची माहिती मिळताच शिरूर पोलिसांनी घटनास्थळी धाव घेतली. घटनास्थळाजवळ रिव्हॉल्व्हर, संशयिताचे कपडे आणि चप्पल आढळल्याची माहिती आहे. परिसरातील सीसीटीव्ही फुटेजच्या आधारे पोलिसांकडून तपास सुरू आहे. या प्रकरणी उमेश चंदनमल छाजेड यांच्या फिर्यादीवरून अज्ञात चोरट्याविरुद्ध जबरी चोरी, गोळीबार, जीवघेणा हल्ला आणि शस्त्रास्त्र कायद्यानुसार गुन्हा दाखल करण्यात आला आहे.
घटनास्थळी आढळलेली मोटारसायकल शिरूरमधील एका व्यापाऱ्याची चोरीस गेलेली असल्याचे तपासात निष्पन्न झाल्याची माहिती आहे. याच मोटारसायकलचा वापर करून १५ ऑक्टोबर रोजी पहाटे भाजी बाजार परिसरात एका महिलेच्या डोक्याला रिव्हॉल्व्हर लावून लुटण्याचा प्रयत्न झाल्याचा संशय आहे. या दोन्ही घटनांचा परस्परसंबंध तपासला जात आहे.
पुणे विभागाचे अपर पोलीस अधीक्षक डॉ. शुभम कुमार, शिरूरचे उपविभागीय पोलीस अधिकारी रवींद्र भोसले, वरिष्ठ पोलीस निरीक्षक विनोद पाटील आणि पुणे ग्रामीण गुन्हे अन्वेषण शाखेचे पोलीस निरीक्षक प्रमोद क्षीरसागर यांनी घटनास्थळी भेट देऊन तपासाचा आढावा घेतला.
आरोपीला अटक करण्यासाठी चार पोलीस पथके रवाना करण्यात आली असून, रेकॉर्डवरील गुन्हेगारांची चौकशी आणि सराईत गुन्हेगारांच्या हालचालींवर लक्ष ठेवण्यात येत आहे.
“१२ वर्षीय मानवी छाजेड हिने संकटाच्या वेळी दाखवलेला प्रतिकार कौतुकास्पद आहे. आरोपीला लवकरात लवकर अटक करण्यासाठी पोलीस पथके रवाना करण्यात आली आहेत”
……उपविभागीय पोलीस अधिकारी रवींद्र भोसले.
