पिंपरी-चिंचवड : नामांकित ऑटो शोरूम कंपनीच्या मालकाचे नाव व छायाचित्र वापरून बनावट व्हॉट्सअॅप अकाऊंट तयार करत कंपनीच्या अकाऊंट एक्झिक्युटिव्हचा विश्वास संपादन करून तब्बल २ कोटी २० लाख रुपयांची आर्थिक फसवणूक केल्याचा प्रकार उघडकीस आला आहे. या प्रकरणात सायबर पोलिसांनी तिघांना अटक केली असून, त्यातील दोघे मूळचे राजस्थानातील जोधपूरचे आहेत.
फिर्यादी यांच्या कंपनीतील अकाऊंट एक्झिक्युटिव्हला १४ ऑगस्ट २०२६ रोजी एका व्हॉट्सअॅप क्रमांकावरून कंपनीच्या खात्याचा बॅलन्स विचारणारा संदेश आला. व्हॉट्सअॅपच्या डीपीवर कंपनीच्या मालकाचे नाव व छायाचित्र असल्याने कर्मचाऱ्याने कोणतीही शंका न घेता खात्याची माहिती दिली. त्यानंतर आरोपींनी विविध बँक खात्यांचे तपशील पाठवून त्यामध्ये पैसे वर्ग करण्याच्या सूचना दिल्या. वारंवार पैशांची मागणी होऊ लागल्याने कर्मचाऱ्याला संशय आला. त्याने कंपनीच्या मालकाशी संपर्क साधल्यानंतर बनावट व्हॉट्सअॅप अकाऊंटद्वारे फसवणूक झाल्याचे समोर आले.
याप्रकरणी सायबर पोलीस ठाण्यात गुन्हा क्रमांक ३८/२०२६ अन्वये भारतीय न्याय संहितेच्या कलम ३१८(४), ३१६(२), ३(५) तसेच माहिती तंत्रज्ञान अधिनियमातील कलम ६६(सी), ६६(डी) अंतर्गत गुन्हा दाखल करण्यात आला.
तपासादरम्यान फसवणुकीची रक्कम ज्या बँक खात्यात वळविण्यात आली होते, ते खाते संचय पराग चव्हाण (वय २०, रा. डोंबिवली पूर्व, मुंबई) याच्या नावावर असल्याचे निष्पन्न झाले. तांत्रिक तपासाच्या आधारे पोलिसांनी त्याला ताब्यात घेतले. चौकशीत त्याने रमेश कुमार शंकरलालजी पुनीया (वय २४) आणि प्रकाश गोरधनराम पंवार (वय २०) यांच्याशी संपर्क असल्याची माहिती दिली. दोघे सध्या पनवेल येथे राहत असून मूळचे जोधपूर, राजस्थान येथील आहेत.
आरोपींनी संचय चव्हाण याच्याकडून विविध बँकांची एकूण पाच खाती मिळवून त्यांचा वापर सायबर फसवणुकीच्या रकमेचे व्यवहार करण्यासाठी केल्याचे तपासात निष्पन्न झाले. फसवणुकीच्या रकमेपैकी काही रक्कम चेक व एटीएमद्वारे काढून घेतल्याचेही समोर आले. तांत्रिक तपासाच्या आधारे रमेश पुनीया व प्रकाश पंवार हे पनवेल परिसरात गॅस दुरुस्तीचे काम करीत असल्याची माहिती मिळाल्यानंतर पोलिसांनी त्यांना अटक केली.
या प्रकरणात तिघांचा सहभाग निष्पन्न झाल्याने त्यांना अटक करण्यात आली असून, गुन्ह्याचा पुढील तपास पोलीस निरीक्षक दिगंबर गायकवाड करीत आहेत. गुन्ह्यातील इतर आरोपी तसेच आर्थिक व्यवहारांशी संबंधित व्यक्तींचा शोध सुरू आहे.
ही कारवाई पोलीस आयुक्त विनय कुमार चौबे, सहपोलीस आयुक्त डॉ. शशिकांत महावरकर, अपर पोलीस आयुक्त सारंग आव्हाड, पोलीस उपआयुक्त (गुन्हे) रोहिदास पवार आणि सहायक पोलीस आयुक्त, सायबर व आर्थिक गुन्हे रोहिणी बानकर यांच्या मार्गदर्शनाखाली करण्यात आली.
कंपन्यांनी सावध राहण्याचे पोलिसांचे आवाहन
सायबर गुन्हेगारांकडून कंपनीचे मालक, सीईओ, एमडी किंवा वरिष्ठ अधिकाऱ्यांच्या नावाने बनावट व्हॉट्सअॅप अकाऊंट तयार करून कर्मचाऱ्यांना व्यावसायिक व्यवहाराच्या नावाखाली पैसे पाठविण्यास सांगितले जात आहे. तसेच झिप फाईल किंवा एपीके फाईलच्या माध्यमातून व्हॉट्सअॅप हॅक करून वरिष्ठ अधिकाऱ्यांचा नंबर ब्लॉक करण्याच्या घटनाही घडत आहेत.
त्यामुळे कोणत्याही वरिष्ठ अधिकाऱ्याच्या नावाने पैशांची मागणी करणारा संदेश प्राप्त झाल्यास पैसे पाठविण्यापूर्वी संबंधित अधिकारी किंवा कंपनीच्या वरिष्ठांशी प्रत्यक्ष अथवा अधिकृत क्रमांकावर संपर्क साधून खात्री करावी, असे आवाहन सायबर पोलिसांनी केले आहे.
