सामाजिक कार्यकर्ते सुहास कुदळे यांचा पाठपुरावा; संबंधित अधिकारी, कर्मचारी व ठेकेदारांवर कारवाईची मागणी
पिंपरी : पिंपरी गावातील तपोवन मंदिर रोड परिसरात मित्र सहकार्य गणेश मंदिराजवळ, कीर्ती हॉस्पिटल शेजारी महावितरण कंपनीच्या डी.पी. बॉक्सचा विजेचा धक्का लागून एका मुक्या गाईचा मृत्यू झाल्याची घटना ७ जुलै २०२६ रोजी दुपारी सव्वाबारा वाजण्याच्या सुमारास घडली होती. या घटनेनंतर सामाजिक कार्यकर्ते सुहास सुनंदा साहेबराव कुदळे यांनी महावितरणच्या वरिष्ठ अधिकाऱ्यांकडे तक्रार करून संबंधित यंत्रणेवर कारवाईची मागणी केली होती.
तक्रारीची दखल घेत महावितरणकडून हे प्रकरण विद्युत सुरक्षा अधिकाऱ्यांकडे सोपविण्यात आले. त्यानंतर ३१ ऑगस्ट २०२६ रोजी कार्यकारी अभियंता, पिंपरी विभाग यांच्या माध्यमातून विद्युत सुरक्षा अधिकाऱ्यांचा अहवाल कुदळे यांना प्राप्त झाला. या अहवालामध्ये सदर घटनेप्रकरणी महावितरण कंपनीला दोषी धरण्यात आल्याचे कुदळे यांनी सांगितले.
घटनेच्या वेळी डी.पी. बॉक्समधून मोठ्या प्रमाणावर विद्युत प्रवाह सुरू असल्याने गाईला विजेचा तीव्र धक्का बसला आणि ती काही अंतरावर फेकली जाऊन जागीच मृत्युमुखी पडली, असा दावा करण्यात आला आहे. या घटनेमुळे परिसरातील नागरिकांमध्येही महावितरणच्या विद्युत यंत्रणेच्या सुरक्षिततेबाबत प्रश्न उपस्थित झाले आहेत.
विद्युत सुरक्षा अधिकाऱ्यांच्या अहवालामुळे आपल्या पाठपुराव्याला पहिले यश मिळाले आहे; मात्र केवळ अहवालावर न थांबता या मृत्यूला कारणीभूत ठरलेल्या संबंधित अधिकारी, कर्मचारी तसेच ठेकेदाराची जबाबदारी निश्चित करून त्यांच्यावर कायदेशीर कारवाई होणे आवश्यक आहे, अशी मागणी सुहास कुदळे यांनी केली आहे.
याप्रकरणी कायदेशीर कारवाईसाठी पिंपरी पोलीस ठाण्यात तक्रार अर्ज दाखल करण्यात येणार असल्याचे त्यांनी सांगितले. “ही लढाई कोणत्याही स्वार्थासाठी नसून मुक्या जीवांच्या आणि आपल्या सर्वांच्या हक्कासाठी आहे,” अशी भूमिका कुदळे यांनी व्यक्त केली.
