निगडी प्रतिनिधी : आदित्य ट्रॅव्हलर्स तिकीट काऊंटर, पवळे ब्रिज, निगडी येथे पीएमपीएमएल बसच्या धडकेत ५८ वर्षीय व्यक्ती गंभीर जखमी झाल्याची घटना दि. २८ ऑगस्ट २०२६ रोजी सकाळी सुमारे ७.४० वाजता घडली. याप्रकरणी निगडी पोलिस ठाण्यात अनोळखी पीएमपीएमएल बसचालकाविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, फिर्यादी प्रणव नंदकुमार शिवशरण (वय २६, रा. मोरेवस्ती, चिखली) यांचे वडील नंदकुमार श्रीरंग शिवशरण (वय ५८) हे आदित्य ट्रॅव्हलर्स तिकीट काऊंटर, पवळे ब्रिजजवळ उभे होते. त्यावेळी लाल रंगाच्या पीएमपीएमएल बसच्या अनोळखी चालकाने रहदारीकडे दुर्लक्ष करून बस बेदरकारपणे व निष्काळजीपणे चालवून नंदकुमार शिवशरण यांना धडक दिली.
या अपघातात त्यांच्या डोक्याला मार लागला असून, ओठापासून हनुवटीपर्यंत कापल्याने गंभीर दुखापत झाली. धडक दिल्यानंतर संबंधित बसचालकाने जखमी व्यक्तीस कोणतीही वैद्यकीय मदत न करता घटनास्थळी न थांबता बस घेऊन तेथून निघून गेल्याचे फिर्यादीत नमूद करण्यात आले आहे.
या प्रकरणी दि. ३० ऑगस्ट २०२६ रोजी सायंकाळी ३.४८ वाजता निगडी पोलिस ठाण्यात गुन्हा क्रमांक ६३९/२०२६ नुसार भारतीय न्याय संहितेतील कलमे २८१, १२५(अ), १२५(ब) तसेच मोटार वाहन कायद्यातील संबंधित कलमांनुसार गुन्हा दाखल करण्यात आला आहे.
पोलिसांकडून अपघातास कारणीभूत ठरलेल्या पीएमपीएमएल बसचालकाचा शोध घेण्यात येत असून, घटनेचा पुढील तपास सुरू आहे.
