जमीन खरेदीसाठी दोन कोटी रुपयांची मागणी; पतीसह सासरच्या मंडळींवर छळाचा आरोप
पुणे/वाकड प्रतिनिधी : पिंपरी-चिंचवड शहरातील वाकड परिसरात हुंड्यासाठी होणाऱ्या शारीरिक व मानसिक छळाला कंटाळून एका विवाहित महिलेने गळफास घेऊन आत्महत्या केल्याची धक्कादायक घटना समोर आली आहे. शिल्पा सचिन गवारे असे मृत महिलेचे नाव आहे. जमीन खरेदीसाठी माहेरून दोन कोटी रुपये आणावेत, तसेच माहेरच्या संपत्तीत हिस्सा मागावा, यासाठी तिचा छळ केला जात असल्याचा आरोप तिच्या भावाने पोलिसांत दिलेल्या फिर्यादीत केला आहे.
शिल्पा गवारे यांचा विवाह २००९ मध्ये झाला होता. त्यांचा सुमारे १७ वर्षांचा संसार होता. त्यांना दोन मुले आहेत. मात्र, सासरच्या मंडळींकडून होत असलेल्या कथित शारीरिक व मानसिक त्रासाला कंटाळून त्यांनी टोकाचे पाऊल उचलल्याचे फिर्यादीत नमूद करण्यात आले आहे.
या प्रकरणी शिल्पा यांच्या भावाने दिलेल्या तक्रारीवरून त्यांच्या पतीसह सासू, सासरे आणि दीर यांच्याविरोधात गुन्हा दाखल करण्यात आला आहे. माहेरच्या संपत्तीत हिस्सा आणण्यासाठी तसेच जमीन खरेदीसाठी मोठी रक्कम आणण्याचा तगादा लावून शिल्पा यांचा छळ करण्यात आल्याचा आरोप आहे.
दरम्यान, गेल्या वर्षी पुण्यातील वैष्णवी हगवणे आत्महत्या प्रकरणाने संपूर्ण राज्याला हादरवून सोडले होते. त्या प्रकरणातही माहेरून मोठी रक्कम आणण्यासाठी विवाहितेचा छळ केल्याचे आरोप झाले होते. त्यानंतर आता पिंपरी-चिंचवडमधील या घटनेमुळे हुंड्यासाठी विवाहित महिलांवर होणाऱ्या छळाचा प्रश्न पुन्हा ऐरणीवर आला आहे.
रक्षाबंधनाचा सण तोंडावर असतानाच शिल्पा यांच्या मृत्यूची घटना घडल्याने त्यांच्या माहेरच्या कुटुंबावर दुःखाचा डोंगर कोसळला आहे. या घटनेमुळे वाकड परिसरातही हळहळ व्यक्त होत आहे.या प्रकरणाचा पुढील तपास वाकड पोलीस करीत असून, तक्रारीतील आरोपांची सखोल चौकशी सुरू आहे.
