विश्रांतवाडी–लोहगाव रस्ता रुंदीकरणासाठी ६८ कोटींच्या तरतुदीचा मार्ग मोकळा; २० वर्षांच्या प्रतीक्षेला पूर्णविराम देण्यासाठी पाठपुरावा सुरूच — नगरसेवक सुहास विजय टिंगरे
पुणे : विश्रांतवाडी–लोहगाव रस्ता रुंदीकरणामुळे बाधित झालेल्या धानोरी परिसरातील सुमारे १७० घरमालकांच्या मोबदल्याचा गेल्या दोन दशकांपासून प्रलंबित असलेला प्रश्न अखेर निर्णयाच्या टप्प्यावर पोहोचला आहे. या प्रश्नासाठी पुणे महानगरपालिकेच्या स्थायी समितीमध्ये प्रस्ताव मांडून ३० एप्रिल २०२६ पासून सातत्याने पाठपुरावा करण्यात आला. स्थायी समितीची मंजुरी मिळाल्यानंतर महापालिकेच्या मासिक सर्वसाधारण सभेनेही प्रस्तावाला मान्यता दिली आहे.
या प्रकरणातील बाधित कुटुंबांमध्ये अनेक माजी सैनिकांचा समावेश असून, सांगली-सातारा परिसरातून पुण्यात येऊन धानोरीत स्थायिक झालेल्या कुटुंबांची संख्याही मोठी आहे. त्यामुळे हा केवळ आर्थिक मोबदल्याचा विषय नसून, अनेक कुटुंबांच्या हक्काचा आणि न्यायाचा प्रश्न असल्याचे नगरसेवक सुहास विजय टिंगरे यांनी सांगितले.
आता या प्रक्रियेतील पुढील महत्त्वाचे पाऊल म्हणजे २०२६-२७ च्या पुणे महापालिका अंदाजपत्रकात सुमारे ६८ कोटी रुपयांची तरतूद करून बाधित घरमालकांना प्रत्यक्ष मोबदला मिळवून देणे.
“आश्वासनांपलीकडे जाऊन आता प्रस्तावाला मंजुरी मिळाली आहे. मात्र, बाधित कुटुंबांच्या हातात प्रत्यक्ष मोबदला मिळेपर्यंत माझा पाठपुरावा थांबणार नाही. धानोरीकरांच्या हक्कासाठी आणि गेल्या २० वर्षांच्या प्रतीक्षेला पूर्णविराम देण्यासाठी माझा लढा सुरूच राहील,”
….नगरसेवक सुहास विजय टिंगरे, पुणे.
दरम्यान, महापालिकेच्या मंजुरीनंतर आता प्रत्यक्ष आर्थिक तरतूद आणि त्यानंतर मोबदला वितरणाची प्रक्रिया वेगाने पूर्ण करण्याची अपेक्षा बाधित कुटुंबांकडून व्यक्त होत आहे.
