मोशी प्रतिनिधी : चाकणकडून भोसरीच्या दिशेने स्कुटीवरून जात असलेल्या दुचाकीस्वाराला पाठीमागून आलेल्या अज्ञात चारचाकी वाहनाने धडक देऊन वाहनचालक पसार झाल्याची घटना मोशी येथील भारत माता चौकाजवळ घडली. या अपघातात दुचाकीस्वाराच्या डोक्याला, तोंडाला तसेच दोन्ही हातांना दुखापत झाली असून स्कुटीचेही मोठे नुकसान झाले आहे.
ही घटना २१ ऑगस्ट रोजी दुपारी साडेदोनच्या सुमारास चाकणकडून भोसरीकडे जाणाऱ्या रस्त्यावर, भारत माता चौकाच्या अलीकडे, मोशी येथे घडली. लखन रघुनाथ पवार (वय ३५) हे ज्युपिटर स्कुटी (एमएच १४ एमवाय ६६९४) वरून जात असताना त्यांच्या पाठीमागून आलेल्या अज्ञात चारचाकी वाहनाने स्कुटीला जोरदार धडक दिली. त्यानंतर चालक वाहनासह घटनास्थळावरून पसार झाला.
धडकेमुळे लखन पवार यांच्या डोक्याच्या मागील बाजूस, तोंडाला आणि दोन्ही हातांना दुखापत झाली. तसेच स्कुटीच्या मागील व डाव्या बाजूचे चेबरे तुटून नुकसान झाले आहे.
याप्रकरणी त्यांचे भाऊ रामू रघुनाथ पवार (वय ४०, रा. नेहरूनगर, पिंपरी) यांनी एमआयडीसी भोसरी पोलिस ठाण्यात फिर्याद दिली. त्यानुसार अज्ञात चारचाकी चालकाविरुद्ध गुन्हा दाखल करण्यात आला आहे. एमआयडीसी भोसरी पोलिस ठाण्यात गुन्हा क्रमांक ४३६/२०२६ नोंदविण्यात आला असून, भारतीय न्याय संहितेतील संबंधित कलमांसह मोटार वाहन कायद्यान्वये कारवाई करण्यात आली आहे. पोलिस अज्ञात वाहनचालकाचा शोध घेत आहेत.
