चाकण/ महाळुंगे एमआयडीसी ……महाळुंगे एमआयडीसीपोलिस ठाण्यात शाळा व्यवस्थापकाविरुद्ध फसवणुकीचा गुन्हा दाखल करण्यात आला आहे. सन २०२२ ते जानेवारी २०२५ या कालावधीत खराबवाडी (ता. खेड) येथील साईबाबा विद्या विकास संस्थेच्या एम. इंग्लिश मीडियम स्कूलमध्ये हा प्रकार घडल्याचे तक्रारीत नमूद आहे.
पोलिसांनी दिलेल्या माहितीनुसार, फिर्यादी महिलेचे मयत पती प्रवीण मार्तंड काळे हे ‘रुद्र ट्रॅव्हल्स’ चालवत होते. त्यांच्या दोन बस शाळेतील विद्यार्थ्यांच्या ने-आण करण्यासाठी वापरण्यात येत होत्या. शाळेकडून या बससेवेची सुविधा घेण्यात आली. मात्र, त्यापोटीची ४ लाख १४ हजार १०० रुपयांची रक्कम संबंधितांकडून देण्यात आली नाही.
आरोपीने प्रत्येक वेळी पैसे देण्यासाठी वेगवेगळी कारणे सांगून वेळ काढला. पैसे देण्याचे आश्वासन देत फिर्यादीचा विश्वास संपादन केला; मात्र आजपर्यंत रक्कम न दिल्याने आपली फसवणूक झाल्याचे फिर्यादीने तक्रारीत म्हटले आहे.
या तक्रारीवरून महाळुंगे एमआयडीसी पोलिस ठाण्यात गुन्हा रजिस्टर क्रमांक ६७३/२०२६ अन्वये भारतीय न्याय संहिता कलम ३१८(४), ३१६(२) तसेच भादंवि कलम ४२० अन्वये गुन्हा दाखल करण्यात आला आहे. गुन्हा २२ ऑगस्ट २०२६ रोजी दुपारी ३.४१ वाजता नोंदविण्यात आला.
या प्रकरणाचा तपास मपोउपनि कदम करीत असून, त्यांना सपोउपनि सुपेकर यांची मदत आहे. आरोपी म्हणून सोमनाथ आनंदराव बोराट (वय ४२, व्यवसाय शाळा व्यवस्थापक, रा. ग्रीन इस्टेट, रोहकल रोड, चाकण) यांचे नाव तक्रारीत नमूद आहे.
