भोसरी : गुंतवणुकीवर दरमहा १० टक्के नफा देण्याचे आमिष दाखवून गुंतवणूकदारांकडून तब्बल ८४ लाख ५१ हजार ६८८ रुपये जमा करून त्यापैकी ६४ लाख ८५ हजार ३४८ रुपयांचा अपहार केल्याचा प्रकार भोसरी येथे उघडकीस आला आहे. याप्रकरणी भोसरी पोलिस ठाण्यात चार जणांविरोधात गुन्हा दाखल करण्यात आला आहे.
पोलिसांनी दिलेल्या माहितीनुसार, जानेवारी २०२५ ते डिसेंबर २०२५ या कालावधीत भोसरी येथील जय गणेश साम्राज्य, गोदाऊन चौकातील कार्यालय क्रमांक १४२, जी ब्लॉक येथे हा प्रकार घडला. आरोपींनी ‘ग्रो कॅपिटल’ आणि ‘विश्वांजली व्हेंचर्स एलएलपी’ या कंपन्यांमध्ये गुंतवणूक करण्याचे आवाहन केले. भारतातून परदेशात विविध वस्तूंची आयात-निर्यात करणारी मोठी कंपनी असल्याचे सांगून एक लाख रुपयांची गुंतवणूक केल्यास २० महिन्यांसाठी दरमहा १० टक्के नफा देण्याचे आश्वासन देण्यात आले.
जास्त परताव्याचे आमिष दाखवून फिर्यादी तसेच अन्य गुंतवणूकदारांकडून ऑनलाइन आणि रोख स्वरूपात एकूण ८४ लाख ५१ हजार ६८८ रुपये स्वीकारण्यात आले. त्यापैकी १९ लाख ६६ हजार ३४० रुपये परतावा म्हणून देण्यात आले. मात्र उर्वरित ६४ लाख ८५ हजार ३४८ रुपये स्वतःच्या आर्थिक फायद्यासाठी वापरून गुंतवणूकदारांची फसवणूक केल्याचा आरोप फिर्यादीने केला आहे.
याप्रकरणी विकी अशोक हनुमंते (वय ४१, रा. काळेवाडी, पुणे) यांनी भोसरी पोलिस ठाण्यात फिर्याद दिली आहे. त्यानुसार मनोज अशोक पाटील (वय ४६, रा. नालवाडी, जि. वर्धा) याच्यासह तीन जणांविरोधात भारतीय न्याय संहितेच्या कलम ३१६(२), ३१६(५), ३(५) तसेच महाराष्ट्र ठेवीदारांच्या हितसंबंधांचे संरक्षण अधिनियम १९९९ मधील कलम ३ व ४ अन्वये गुन्हा दाखल करण्यात आला आहे.या प्रकरणाचा पुढील तपास पोलीस उपनिरीक्षक शिवकुमार दगडगावे करीत आहेत.
