पिंपरी : कासारवाडी येथील ‘ह’ प्रभाग क्षेत्रीय कार्यालयाच्या परिसरात शेडवरील लाईटिंग काढण्याचे काम करताना उंचीवरून पडून ६५ वर्षीय सुरक्षा रक्षकाच्या मुलाचा मृत्यू झाल्याची घटना घडली. या प्रकरणी कामाच्या ठिकाणी आवश्यक सुरक्षा व्यवस्था उपलब्ध न करून दिल्याप्रकरणी दोन जणांविरुद्ध दापोडी पोलिस ठाण्यात गुन्हा दाखल करण्यात आला आहे.
पोलिसांनी दिलेल्या माहितीनुसार, राहुल साबळे असे मृत्यू झालेल्या तरुणाचे नाव आहे. याप्रकरणी त्याचे वडील विठ्ठल महायु साबळे (वय ६५, व्यवसाय—सिक्युरिटी गार्ड, रा. विजयनगर, काळेवाडी) यांनी फिर्याद दिली आहे.
दि. १८ ऑगस्ट रोजी दुपारी दोनच्या सुमारास कासारवाडी येथील ‘ह’ प्रभाग क्षेत्रीय कार्यालयाच्या परिसरातील शेडवरील लाईटिंग काढण्याचे काम सुरू होते. संबंधित कामासाठी पार्वती इलेक्ट्रॉनिक्स अँड इलेक्ट्रिकल या फर्मचे मालक तसेच ए लाईट अँड डेकोरेशन दुकानाचे मालक यांनी उंचीवर काम करण्यासाठी आवश्यक सुरक्षा साधने उपलब्ध करून दिली नसल्याचा आरोप आहे.
कामगारांना सेफ्टी बेल्ट, सुरक्षित शूज, हेल्मेट तसेच सुरक्षित शिडी उपलब्ध करून न दिल्याने राहुल साबळे शेडवरील लाईटिंग काढण्याचे काम पूर्ण झाल्यानंतर खाली उतरत असताना त्याचा तोल गेला. तो पहिल्या मजल्यावरील पत्र्याच्या शेडवरून खाली पडला. या दुर्घटनेत त्याच्या डोक्याला व पायाला गंभीर दुखापत झाली. उपचारादरम्यान त्याचा मृत्यू झाला.
या प्रकरणी दापोडी पोलिसांनी भारतीय न्याय संहितेच्या कलम १०६ अन्वये गुन्हा दाखल केला आहे. राम इंगळे आणि अब्दुल गुलाब बेग, दोघेही रा. काळेवाडी, यांना नोटीस देण्यात आली आहे. पुढील तपास स.पो.नि निकम करीत आहेत.
