चिंचवड : दारू पिण्यासाठी पैसे देण्यास नकार दिल्याच्या कारणावरून टपरी चालकाला शिवीगाळ करून फावडे, दगड व लाकडी दांडक्याने मारहाण केल्याची घटना चिंचवड परिसरात घडली. याप्रकरणी निगडी पोलिसांनी चौघांना ताब्यात घेतले असून, अन्य तीन अनोळखी साथीदारांचा शोध सुरू आहे.
पोलिसांनी दिलेल्या माहितीनुसार, फिर्यादी गणेश बाणु इंगळे (वय २७, व्यवसाय—टपरी चालक, रा. अजंठानगर, चिंचवड) हे १८ ऑगस्ट रोजी सायंकाळी पाचच्या सुमारास ग्लोबल वाईन्स, धर्मॅक्स चौक, चिंचवड तसेच माता रमाबाई भीमराव आंबेडकर प्राथमिक शाळेसमोरील परिसरात होते. त्यावेळी आरोपींनी त्यांच्याकडे दारू पिण्यासाठी पैशांची मागणी केली. पैसे देण्यास नकार दिल्याने आरोपींनी फिर्यादीला शिवीगाळ करून मारहाण केली.आरोपींनी फावडे, दगड आणि लाकडी दांडक्याने फिर्यादीच्या पायावर तसेच पाठीवर मारहाण करून दुखापत केल्याचे तक्रारीत नमूद आहे.
याप्रकरणी गणेश इंगळे यांच्या फिर्यादीवरून निगडी पोलीस ठाण्यात गुन्हा क्रमांक ५७८/२०२६ अन्वये भारतीय न्याय संहितेतील विविध कलमांनुसार गुन्हा दाखल करण्यात आला आहे. आरोपी लथान संजय सुतार (वय २९), प्रकाश पोळ (वय २८), नितीन साबळे (वय ३२) आणि सचिन भागवत (वय २५), सर्व रा. अजंठानगर, चिंचवड, यांना ताब्यात घेण्यात आले आहे. त्यांचे अन्य तीन साथीदार फरार असून, त्यांचा शोध घेण्यात येत आहे.गुन्ह्याचा पुढील तपास निगडी पोलीस करीत आहेत.
