पिंपरी : सोशल मीडिया प्लॅटफॉर्म इन्स्टाग्रामच्या माध्यमातून संपर्क साधून अवैध अग्निशस्त्रांची विक्री करणाऱ्या एका पिस्तूल डीलरला पिंपरी-चिंचवड पोलिसांच्या मालमत्ता गुन्हे विरोधी पथकाने भोसरी येथे गुरुवारी (दि. २०) रंगेहात अटक केली. आरोपीकडून दोन गावठी बनावटीच्या लोखंडी पिस्तुलांसह दोन जिवंत काडतुसे असा एकूण १ लाख २ हजार रुपयांचा मुद्देमाल जप्त करण्यात आला.
मंगेश मालु कोकणे (वय २०, रा. मुगाव, ता. नायगाव, जि. नांदेड) असे अटक केलेल्या आरोपीचे नाव आहे. आरोपी एमआयडीसीतील एका खासगी कंपनीत काम करत असून, वरकमाईसाठी अवैध पिस्तूल विक्रीचा व्यवसाय करीत असल्याचे पोलिसांच्या प्राथमिक तपासात समोर आले आहे. तो मध्य प्रदेशातून सुमारे २५ हजार रुपयांना पिस्तूल खरेदी करून पिंपरी-चिंचवड परिसरात सुमारे ५० हजार रुपयांना विकत असल्याचेही तपासात निष्पन्न झाले आहे.
गुन्हे शाखेचे पोलीस उपायुक्त रोहिदास पवार यांनी या कारवाईची माहिती दिली. पोलीस आयुक्त विनयकुमार चौबे यांनी आयुक्तालयाच्या हद्दीत अवैध शस्त्रे बाळगणाऱ्यांविरोधात कठोर कारवाई करण्याचे आदेश दिले होते. त्यानुसार मालमत्ता गुन्हे विरोधी पथक गस्त घालत असताना पोलीस अंमलदार गणेश सावंत, विनोद वीर आणि हर्षद कदम यांना नांदेड येथील ‘एम. के.’ नावाचा तरुण इन्स्टाग्रामच्या माध्यमातून संपर्क साधून पिंपरी-चिंचवड परिसरात पिस्तूल विक्री करीत असल्याची गोपनीय माहिती मिळाली.
मिळालेल्या माहितीच्या आधारे तसेच तांत्रिक तपासाच्या मदतीने पोलिसांनी भोसरी येथील गावजत्रा मैदान परिसरात सापळा रचला. संशयितरीत्या आलेल्या मंगेश कोकणे याला पोलिसांनी ताब्यात घेतले. त्याची झडती घेतली असता विक्रीच्या उद्देशाने आणलेली दोन देशी बनावटीची पिस्तुले आणि दोन जिवंत काडतुसे आढळून आली.
याप्रकरणी भोसरी पोलीस ठाण्यात शस्त्र अधिनियम कलम ३, २५ तसेच महाराष्ट्र पोलीस अधिनियम कलम ३७(१)(३) सह १३५ अन्वये गुन्हा दाखल करण्यात आला आहे. या प्रकरणाचा पुढील तपास पोलीस करीत आहेत.
ही कारवाई वरिष्ठ पोलीस निरीक्षक संजय चव्हाण, सहाय्यक पोलीस निरीक्षक पांडुरंग देवकाते, गोरक्षनाथ बालवडकर, रावसाहेब मोटे यांच्या मार्गदर्शनाखाली पोलीस अंमलदार गणेश सावंत, विनोद वीर, हर्षद कदम, गणेश कोकणे, अशोक मरळ, गणेश हिंगे, चंद्रकांत गडदे, नितीन उमरजकर, नितीन लोखंडे, मोहसीन अत्तार, प्रविण कांबळे, ज्ञानेश्वर कोळगे, नागेश माळी आणि प्रकाश ननावरे यांच्या पथकाने केली.
