बनावट पोलीस अधिकारी बनून ७१ वर्षीय निवृत्त व्यक्तीची १५ लाखांची फसवणूक

सर्वोच्च न्यायालयाचे बनावट पत्र पाठवून ‘डिजिटल अरेस्ट’ची धमकी; मनी लॉन्ड्रिंग व दहशतवादी कारवायांच्या नावाखाली रक्कम उकळली

पिंपळे गुरव, पुणे : पोलीस अधिकारी असल्याचे भासवून तसेच सर्वोच्च न्यायालयाचे बनावट व खोटे पत्र तयार करून एका ७१ वर्षीय निवृत्त व्यक्तीला दहशतवादी कारवाया, मनी लॉन्ड्रिंग आणि राष्ट्रीय सुरक्षेशी संबंधित गंभीर गुन्ह्यात अडकविण्याची भीती दाखवत तब्बल १५ लाख रुपयांची फसवणूक केल्याचा धक्कादायक प्रकार पिंपळे गुरव परिसरात उघडकीस आला आहे.

पोलिसांनी दिलेल्या माहितीनुसार, फिर्यादी विष्णू महादेव धारे (वय ७१, रा. गजानन नगर, रस्ता क्रमांक २, पिंपळे गुरव, पुणे) यांना २ ते ६ ऑगस्ट २०२६ दरम्यान संशयितांनी संपर्क साधला. संशयितांनी आपण पोलीस अधिकारी असल्याचे भासवून फिर्यादीच्या मोबाईल क्रमांकाचा वापर दहशतवादी कारवायांसाठी झाल्याचे सांगितले.

तसेच फिर्यादीविरुद्ध मनी लॉन्ड्रिंग आणि राष्ट्रीय सुरक्षेशी संबंधित गंभीर गुन्हे दाखल असल्याचे सांगून अटकेची धमकी देण्यात आली. फिर्यादीची मालमत्ता आणि बँक खाती जप्त करण्यात येतील, अशी भीतीही दाखविण्यात आली.

यासाठी संशयितांनी सर्वोच्च न्यायालयाचे असल्याचे भासविणारे खोटे व बनावट पत्र तयार करून फिर्यादीला पाठविले. या सर्व प्रकारामुळे घाबरलेल्या फिर्यादीला एका विशिष्ट बँक खात्यात पैसे जमा करण्यास भाग पाडण्यात आले. त्यानुसार कोटक महिंद्रा बँकेच्या खात्यात विविध व्यवहारांद्वारे एकूण ₹१५ लाख रुपये जमा करण्यात आले.

या प्रकरणात तीन मोबाईल क्रमांकांचा वापर करण्यात आल्याचे समोर आले असून, एका कोटक महिंद्रा बँक खात्याचाही वापर झाल्याचे तक्रारीत नमूद आहे. या प्रकरणात संबंधित संशयितांसह इतर अनोळखी व्यक्तींचाही सहभाग असल्याचा संशय आहे.

या प्रकरणाचा पुढील तपास सपोनि बोराडे यांच्या मार्गदर्शनाखाली सुरू असून, बपोनि कोळी यांच्यासह पोलीस पथक तपास करीत आहे. संशयितांनी वापरलेले मोबाईल क्रमांक, बँक खाते तसेच पैशांच्या व्यवहारांचा तपास करून फसवणुकीच्या संपूर्ण रॅकेटचा शोध घेण्याचे पोलिसांसमोर आव्हान आहे.

नागरिकांनी सावध राहण्याचे आवाहन

पोलीस किंवा न्यायालयाच्या नावाने फोन करून अटक, मनी लॉन्ड्रिंग किंवा दहशतवादी कारवायांशी संबंधित गुन्ह्यांची भीती दाखवून पैसे मागितल्यास नागरिकांनी घाबरून कोणतीही रक्कम जमा करू नये. अशा प्रकारच्या संशयास्पद कॉलची तातडीने संबंधित यंत्रणेकडे तक्रार करावी, असे आवाहन करण्यात येत आहे.