अध्यक्ष व व्यवस्थापकीय संचालक महेश आव्हाड यांच्या नियोजनबद्ध कार्यक्षमतेला सांघिक प्रयत्नांची जोड
पुणे, दि.१८ ऑगस्ट २०२६ : पुणे महानगर परिवहन महामंडळाने (PMPML) दि.१७ ऑगस्ट रोजी उत्पन्नाच्या बाबतीत उल्लेखनीय कामगिरी करत तब्बल ₹ २ कोटी ५१ लाख १५ हजार ६४ रुपयांचे विक्रमी एकूण उत्पन्न मिळविले. अध्यक्ष व व्यवस्थापकीय संचालक महेश आव्हाड यांच्या नियोजनबद्ध कार्यक्षम नेतृत्वाला चालक, वाहक, वाहतूक निरीक्षक, चेकर, डेपो प्रशासन तसेच विविध विभागांच्या सांघिक प्रयत्नांची जोड मिळाल्याने महामंडळाच्या उत्पन्नवाढीस मोठी चालना मिळाली आहे.
दि.१७ ऑगस्ट रोजी पीएमपीएमएलला तिकीट रोख उत्पन्नातून ₹ १ कोटी ५९ लाख १६ हजार ४०३, पासेसमधून ₹ ५७ लाख २ हजार ७३०, पुणे दर्शन व पर्यटनातून ₹ १ लाख ४५ हजार, तर मोबाईल ॲपमधून ₹ ३३ लाख ५० हजार ९३१ रुपये उत्पन्न प्राप्त झाले. या सर्वांचा एकत्रित आकडा ₹ २ कोटी ५१ लाख १५ हजार ६४ इतका आहे
या दिवशी दोन्ही शिफ्टची सरासरी धरता एकूण १,७६७ बस रस्त्यावर कार्यरत होत्या. यामध्ये PMPMLच्या ६५३ पैकी ५२४ बस, तर भाडेतत्त्वावरील १३८८ पैकी १२४३ बस मार्गावर धावत होत्या. उपलब्ध बसचा प्रभावी वापर करून प्रवाशांना अधिकाधिक आणि दर्जेदार सार्वजनिक वाहतूक सेवा देण्यावर भर देण्यात आला.
महामंडळाच्या या उल्लेखनीय कामगिरीत प्रत्येक अधिकारी व कर्मचाऱ्याचा मोलाचा वाटा आहे. एकजुटीने केलेले नियोजन, शिस्तबद्ध कामकाज, वेळेचे काटेकोर नियोजन, प्रवाशांशी सौजन्यपूर्ण वर्तन आणि उत्पन्नवाढीची सकारात्मक भावना यामुळे ही यशस्वी कामगिरी साध्य झाली.
अध्यक्ष व व्यवस्थापकीय संचालक महेश आव्हाड यांच्या नेतृत्वाखाली महामंडळाची तूट कमी करण्यासाठी विविध पातळ्यांवर सातत्याने प्रयत्न सुरू आहेत. उत्पन्नवाढीसोबतच खर्चावर नियंत्रण, उपलब्ध साधनसामग्रीचा कार्यक्षम वापर आणि प्रवाशांना अधिक चांगली सेवा देण्यावर विशेष भर दिला जात आहे.
“आपली सेवा – आपली जबाबदारी, आपले उत्पन्न – महामंडळाची प्रगती!” ही भावना मनात ठेवून आगामी काळात दररोजच्या उत्पन्नात आणखी वाढ करून ₹ २.५१ कोटींच्या पुढे नवा विक्रम प्रस्थापित करण्याचा संकल्प करण्याचे आवाहन करण्यात आले आहे.
प्रत्येक बस, प्रत्येक फेरी आणि प्रत्येक प्रवासी हा महामंडळाच्या उत्पन्नवाढीचा महत्त्वाचा घटक आहे. त्यामुळे सर्व अधिकारी, चालक-वाहक, कर्मचारी आणि संबंधित घटकांनी अधिक जबाबदारीने, प्रामाणिकपणे व उत्साहाने काम करून PMPMLच्या आर्थिक बळकटीकरणास हातभार लावावा, असे आवाहन करण्यात आले आहे.
या उत्कृष्ट कामगिरीबद्दल PMPMLच्या सर्व अधिकारी, चालक-वाहक, कर्मचारी आणि संबंधित घटकांचे मनःपूर्वक अभिनंदन करण्यात आले आहे.
“एकत्र येऊया… अधिक सेवा देऊया… अधिक उत्पन्न आणूया… PMPMLला आर्थिकदृष्ट्या सक्षम बनवूया!”
