पिंपरी-चिंचवड सायबर पोलिसांची नऊ महिन्यांची अथक तपासमोहीम; निवृत्त बँक अधिकाऱ्याची २ कोटी १४ लाख ७० हजारांची फसवणूक
पिंपरी-चिंचवड, प्रतिनिधी : पोलीस अधिकारी असल्याचे भासवून एका निवृत्त बँक अधिकाऱ्याला अटक करण्याची भीती दाखवत तब्बल २ कोटी १४ लाख ७० हजार ३५८ रुपयांची सायबर फसवणूक करणाऱ्या टोळीतील मुख्य आरोपीला पिंपरी-चिंचवड सायबर पोलिसांनी राजस्थानमधून अटक केली. तब्बल नऊ महिन्यांच्या अथक तपासानंतर ही कारवाई करण्यात आली असून, राजेंद्र गणराज नागर (वय ३२, रा. जलखोडा, ता. नैनवा, जि. बूंदी, राजस्थान) असे अटक केलेल्या आरोपीचे नाव आहे.
सायबर पोलीस ठाण्यात गुन्हा रजि. क्र. ४८/२०२५ अन्वये भारतीय न्याय संहिता आणि माहिती तंत्रज्ञान अधिनियमातील विविध कलमांनुसार गुन्हा दाखल करण्यात आला होता. गुन्ह्यातील रक्कम मोठी असल्याने पोलीस आयुक्त विनय कुमार चौबे यांनी आरोपीचा तातडीने शोध घेऊन अटक करण्याचे आदेश दिले होते.
फिर्यादी हे सेवानिवृत्त बँक अधिकारी आहेत. आरोपींनी स्वतःची ओळख पोलीस अधिकारी म्हणून करून त्यांचा विश्वास संपादन केला. त्यानंतर फिर्यादी व त्यांच्या पत्नीच्या बँक खात्यांची माहिती मिळवून त्यांच्या खात्यांमध्ये पीएफआय संघटनेशी संबंधित पैसे जमा झाल्याचे सांगितले.
या कथित व्यवहारामुळे अटक होण्याची भीती दाखवून आरोपींनी बनावट पोलीस कागदपत्रे व नोटिसांचा वापर केला. बँक खाती आणि एफडीतील रक्कम ‘पडताळणी’च्या नावाखाली विविध खात्यांमध्ये वर्ग करण्यास सांगितले. पडताळणी झाल्यानंतर पैसे परत केले जातील, असे सांगून आरोपींनी तब्बल २,१४,७०,३५८ रुपये विविध खात्यांमध्ये वर्ग करून घेतले.या प्रकरणी १७ नोव्हेंबर २०२५ रोजी सायबर पोलीस ठाण्यात गुन्हा दाखल करण्यात आला होता.
तपासादरम्यान आरोपींनी फसवणुकीची रक्कम प्राप्त करण्यासाठी विविध बँकांमधील सहा खात्यांचा वापर केल्याचे निष्पन्न झाले. संबंधित बँकांकडून प्राप्त झालेल्या माहितीचे तांत्रिक व आर्थिक विश्लेषण करण्यात आले.
त्यावेळी M/s Sultan Construction and Material Suppliers या नावाने असलेल्या आयसीआयसीआय बँक खात्यात गुन्ह्यातील ४९ लाख २० हजार २०० रुपये जमा झाल्याचे समोर आले. त्यापैकी ३८ लाख रुपये पुढे बँक ऑफ बडोदा खात्यात वर्ग करण्यात आले. त्यानंतर ही रक्कम धनादेशाद्वारे काढण्यात आल्याचे तपासात निष्पन्न झाले.
सदर बँक खाते राजेंद्र गणराज नागर याच्या नावावर असल्याचे बँक अभिलेखातून स्पष्ट झाले. पोलिसांनी त्याला बीएनएसएस कलम ३५(३) अन्वये नोटीस बजावून तपासासाठी हजर राहण्यास सांगितले. मात्र, तो तपासासाठी हजर झाला नाही. त्याचा मोबाईलही बंद असल्याचे आढळून आले.
त्यानंतर पोलिसांनी बँकेकडील सीसीटीव्ही फुटेज, मोबाईल क्रमांकाचा सीडीआर आणि तांत्रिक माहिती यांचे बारकाईने विश्लेषण केले. सीसीटीव्हीमध्ये आरोपीने स्वतः बँकेतून रक्कम काढल्याचे स्पष्ट झाले. तांत्रिक तपासातून आरोपी राजस्थानमधील बूंदी जिल्ह्यातील लाखेरी पोलीस ठाण्याच्या हद्दीत असल्याची खात्रीशीर माहिती मिळाली.स्थानिक पोलिसांच्या मदतीने शोधमोहीम राबवून ८ ऑगस्ट २०२६ रोजी दुपारी एक वाजता राजेंद्र नागर याला अटक करण्यात आली.
अटकेनंतर आरोपीची चौकशी केली असता त्याने अरविंद उर्फ राजा याच्या मदतीने गुन्ह्यातील रक्कम विविध बँक खात्यांमध्ये प्राप्त करून तिची विल्हेवाट लावल्याची माहिती दिली. अरविंद उर्फ राजा याचे पूर्ण नाव व पत्ता अद्याप निष्पन्न झालेला नसून, त्याचा शोध घेण्याची कार्यवाही सुरू आहे.
ही कारवाई पोलीस आयुक्त विनय कुमार चौबे, सह पोलीस आयुक्त डॉ. शशिकांत महावरकर, अपर पोलीस आयुक्त सारंग आव्हाड, पोलीस उपआयुक्त (गुन्हे) रोहिदास पवार आणि सहायक पोलीस आयुक्त, सायबर व आर्थिक गुन्हे रोहिणी बानकर यांच्या मार्गदर्शनाखाली करण्यात आली.
वरिष्ठ पोलीस निरीक्षक रविकिरण नाळे, सहायक पोलीस निरीक्षक प्रवीण स्वामी, पोलीस उपनिरीक्षक सागर पोमण, पोलीस उपनिरीक्षक प्रकाश कातकडे तसेच पोलीस अंमलदारांनी या कारवाईत सहभाग घेतला.गुन्ह्यातील इतर आरोपी तसेच आर्थिक व्यवहारांशी संबंधित व्यक्तींचा शोध घेण्यासाठी सायबर पोलिसांकडून पुढील तपास सुरू आहे.
