पिंपरी-चिंचवड गुन्हे शाखा युनिट-१ची दमदार कारवाई; सुशिक्षित तरुणाला अटक, चोरीचे २२ गुन्हे उघड
पिंपरी, दि. १६ ऑगस्ट २०२६ : कमी वेळात जास्त पैसे कमावण्याच्या मोहापायी मोटारसायकली चोरी करून त्या परराज्यातील व जिल्ह्यातील व्यक्तींना विक्री करणाऱ्या एका ३३ वर्षीय तरुणाला पिंपरी-चिंचवड गुन्हे शाखा युनिट-१च्या पथकाने अटक केली आहे. आरोपीकडून विविध कंपन्यांच्या तब्बल २२ महागड्या मोटारसायकली हस्तगत करण्यात आल्या असून, सुमारे १२ लाख ९० हजार रुपयांचा मुद्देमाल जप्त करण्यात आला आहे. या कारवाईमुळे पिंपरी-चिंचवड, पुणे शहर आणि पुणे ग्रामीण परिसरातील दुचाकी चोरीचे २२ गुन्हे उघडकीस आले आहेत.
पिंपरी-चिंचवड पोलीस आयुक्तालयाच्या हद्दीत वाढत्या मोटारसायकल चोरीच्या घटनांना आळा घालण्यासाठी पोलीस आयुक्त विनयकुमार चौबे यांनी गुन्हे शाखेला विशेष सूचना दिल्या होत्या. अपर पोलीस आयुक्त सारंग आवाड, पोलीस उपआयुक्त (गुन्हे) रोहिदास पवार आणि सहाय्यक पोलीस आयुक्त डॉ. सुदर्शन राठोड यांच्या मार्गदर्शनाखाली गुन्हे शाखा युनिट-१चे वरिष्ठ पोलीस निरीक्षक रामेश्वर मोताळे यांच्या नेतृत्वाखाली ही कारवाई करण्यात आली.
पिंपरी पोलीस ठाण्यात मोटारसायकल चोरीचा गुन्हा दाखल झाल्यानंतर वरिष्ठ पोलीस निरीक्षक मोताळे यांनी घटनास्थळी भेट देऊन तपासाची सूत्रे हाती घेतली. सहायक पोलीस निरीक्षक दत्तात्रय गुळीग, पोलीस उपनिरीक्षक कर्मराज गावडे तसेच पोलीस कर्मचारी विजय जानराव, केशव चेपटे आणि तेजस भालचिम यांचे विशेष पथक तयार करण्यात आले.
३०० सीसीटीव्ही कॅमेऱ्यांचे फुटेज तपासले
चोरट्याचा माग काढण्यासाठी पोलिसांनी घटनास्थळापासून आरोपीच्या येण्या-जाण्याच्या मार्गावरील तब्बल २५० ते ३०० सीसीटीव्ही कॅमेऱ्यांचे फुटेज तपासले. आरोपी मुख्य रस्त्यांचा वापर न करता वारंवार मार्ग बदलून आडरस्त्याने जात असल्याचे पोलिसांच्या निदर्शनास आले. सातत्याने सीसीटीव्ही फुटेजचे तांत्रिक विश्लेषण आणि पडताळणी केल्यानंतर पोलिसांनी आरोपीची ओळख पटवली.
सचिन पांडुरंग मरळे (वय ३३, सध्या रुई, ता. बारामती, जि. पुणे; सध्या जुनी सांगवी, पुणे येथे भाड्याने राहणार) असे आरोपीचे नाव आहे.
दरम्यान, आरोपीचा शोध घेत असताना पोलिसांना खबऱ्यामार्फत त्याची माहिती मिळाली. त्यानुसार सापळा रचण्यात आला. पोलिसांचा शोध सुरू असल्याची चाहूल आरोपीला लागल्याने तो मोटारसायकलवरून निघून जात होता. पोलिसांनी त्याचा पाठलाग करून शिताफीने त्याला चोरीच्या मोटारसायकलीसह ताब्यात घेतले.
इलेक्ट्रिशियन कोर्सदरम्यान झालेल्या ओळखीचा गैरफायदा
आरोपीकडे केलेल्या सखोल चौकशीत त्याने पिंपरी-चिंचवड, पुणे शहर आणि पुणे ग्रामीण पोलीस हद्दीतून २२ मोटारसायकली चोरी केल्याची कबुली दिल्याचे पोलिसांनी सांगितले. साधारण एक ते दीड वर्षांपूर्वी इलेक्ट्रिशियनचा कोर्स करत असताना झालेल्या ओळखींचा त्याने या गैरप्रकारासाठी वापर केला.
चोरीच्या मोटारसायकली विकताना त्या बनावट कागदपत्रांच्या अथवा बँकेच्या लिलावातून मिळालेल्या फायनान्सच्या गाड्या असल्याचे खोटे सांगून विविध व्यक्तींना विकल्याचे तपासात निष्पन्न झाले आहे.
चोरीच्या गाड्या खरेदी करणाऱ्यांवरही कारवाई
पोलिसांच्या तपासात काही व्यक्तींनी वाहनाची कागदपत्रे किंवा मूळ मालकीची खात्री न करता स्वतःच्या फायद्यासाठी चोरीच्या मोटारसायकली खरेदी केल्याचे निष्पन्न झाले. त्यामुळे चोरीची मालमत्ता स्वीकारल्याप्रकरणी संबंधितांवरही कायदेशीर कारवाई करण्यात आली आहे.
आरोपीने चोरीच्या मोटारसायकली पुणे, अहिल्यानगर, सोलापूर, बीड आणि रायगड जिल्ह्यातील व्यक्तींना विकल्याचे तपासात समोर आले आहे. काही वाहनांना खरेदीदार न मिळाल्याने आरोपीने त्या लपवून ठेवल्या होत्या. पोलिसांनी या वाहनांचाही शोध घेऊन त्या जप्त केल्या.
या गुन्ह्यांचा झाला उलगडा
तपासादरम्यान संत तुकारामनगर, पिंपरी, चतु:शृंगी, हिंजवडी, सांगवी, दापोडी, शिरूर आणि भोसरी पोलीस ठाण्यांमधील मोटारसायकल चोरीचे गुन्हे उघडकीस आले आहेत. यामध्ये पिंपरी पोलीस ठाण्यातील गुन्हा क्र. ४४७/२०२६ यासह एकूण २२ गुन्ह्यांचा समावेश आहे. त्यापैकी १६ गुन्ह्यांची माहिती पोलिसांनी जाहीर केली असून उर्वरित सहा मोटारसायकलींबाबतचा तपास सुरू आहे.
या कारवाईमुळे दुचाकी चोरीच्या वाढत्या घटनांना आळा घालण्यास मोठी मदत होणार असून, चोरीची वाहने खरेदी करणाऱ्यांवरही पोलिसांची नजर असल्याचे स्पष्ट झाले आहे.
ही कारवाई पोलीस आयुक्त विनयकुमार चौबे, सहपोलीस आयुक्त शशिकांत महावरकर, अपर पोलीस आयुक्त सारंग आवाड, पोलीस उपआयुक्त (गुन्हे) रोहिदास पवार आणि सहाय्यक पोलीस आयुक्त डॉ. सुदर्शन राठोड यांच्या मार्गदर्शनाखाली वरिष्ठ पोलीस निरीक्षक रामेश्वर मोताळे यांच्या नेतृत्वाखाली करण्यात आली. त्यांच्या पथकातील अधिकारी व कर्मचाऱ्यांनी तपासात महत्त्वाची भूमिका बजावली.
