देहूरोड, दि. २५ जुलै : देहूरोड येथील विकासनगर-किवळे परिसरातील ज्येष्ठ नागरिक संघाच्या वतीने आयोजित करण्यात आलेला पालखी सोहळा शनिवारी भक्तिमय आणि उत्साहपूर्ण वातावरणात संपन्न झाला. ज्येष्ठ नागरिक महिला व पुरुषांनी मोठ्या संख्येने सहभागी होत विठ्ठलनामाच्या गजरात परिसर दुमदुमून सोडला.
के व्हिला येथून पालखी सोहळ्याची सुरुवात होऊन विकासनगर येथील विठ्ठल मंदिर ते दत्त मंदिर असा मार्गक्रमण करण्यात आला. महिलांनी फुगड्या, रिंगण, भजन आणि भक्तिगीते सादर करत “विठ्ठल विठ्ठल विठ्ठला, हरी ओम विठ्ठला”, “चल गं सखे पंढरीला” अशा अभंगांनी वातावरण भक्तिमय केले. तसेच एका चिमुकल्याने विठ्ठल-रुक्मिणीचा वेश परिधान करून सोहळ्याची आकर्षक रंगत वाढवली.
या सोहळ्यास शिवसेना पिंपरी-चिंचवड शहरप्रमुख निलेश तरस, शिवसेना नगरसेविका ऐश्वर्या राजेंद्र तरस, भाजप नगरसेवक धर्मपाल तंतरपाळे तसेच सामाजिक कार्यकर्ते राजेंद्र तरस यांनी प्रमुख उपस्थिती लावली.
कार्यक्रमाच्या यशस्वी आयोजनासाठी संघाचे अध्यक्ष नानासाहेब डोईफोडे, सचिव पंढरीनाथ सानप, खजिनदार मारुती भराटे, कार्याध्यक्ष इलियास खान तसेच सदस्य मच्छिंद्र कदम, माणिक एकड, किसन एकड, गफूरभाई शेख, दिलीप रोकडे, दशरथ वाघमारे, गजानन ठाणे, लक्ष्मण सुपे, ज्ञानोबा पाटोळे, रवींद्र कदम, विलास पळसुळे, एम. डी. चौधरी, सुरेखा वाघ, सविता ब्रम्हे आणि कल्पिता पळसुळे यांच्यासह अनेक ज्येष्ठ नागरिकांनी उत्स्फूर्त सहभाग नोंदविला.
