चाकण उत्तर म्हाळुंगे : महाळुंगे इंगळे (ता. खेड, जि. पुणे) येथे घडलेल्या घरफोडीच्या गुन्ह्याचा उत्तर महाळुंगे पोलिसांनी चार महिन्यांच्या अथक तपासानंतर पर्दाफाश केला आहे. या प्रकरणात चार आरोपींना अटक करण्यात आली असून त्यांच्याकडून सुमारे १४ तोळे सोन्याचे दागिने, किंमत ₹१२.६० लाख, जप्त करण्यात आले आहेत.
महाळुंगे इंगळे येथील रहिवासी सौ. कविता मदन कड या भाजी विक्रीचा व्यवसाय करतात. त्या यात्रेनिमित्त मूळ गावी गेल्या असताना ६ फेब्रुवारी २०२६ रोजी पहाटे दोनच्या सुमारास अज्ञात चोरट्यांनी त्यांच्या दुकानाच्या गाळ्याचे शटर उचकटून आत प्रवेश केला. दुकानातील साहित्य अस्ताव्यस्त करून कपाटातील सोन्याचे दागिने चोरून नेले. याप्रकरणी उत्तर महाळुंगे पोलीस ठाण्यात गुन्हा क्रमांक १०७/२०२६ भारतीय न्याय संहिता कलम ३३१(३) व ३०५ अन्वये गुन्हा दाखल करण्यात आला होता.
घटनेनंतर पोलीस उपायुक्त श्वेता खेडकर यांनी घटनास्थळी भेट देऊन तपासाबाबत आवश्यक सूचना दिल्या. वरिष्ठ पोलीस निरीक्षक दिगंबर सूर्यवंशी यांच्या मार्गदर्शनाखाली सहायक पोलीस निरीक्षक कल्याण घाडगे व गुन्हे शोध पथकाने परिसरातील सीसीटीव्ही फुटेज आणि तांत्रिक विश्लेषणाच्या आधारे तपास सुरू ठेवला.
दरम्यान, पोलीस अंमलदार संतोष काळे व शुभम खंडागळे यांना मिळालेल्या गोपनीय माहितीनुसार दोन संशयितांना ताब्यात घेण्यात आले. चौकशीत त्यांनी गुन्ह्याची कबुली देत मुख्य आरोपी निक्कुकुमार देवकी सिंग हा चोरीचे सोने घेऊन बिहारला पळून गेल्याची माहिती दिली. तपासात आरोपीने त्याचा भाऊ रंजनकुमार सिंग याच्या मदतीने दागिने लपविल्याचेही निष्पन्न झाले.
चार महिन्यांच्या सातत्यपूर्ण तपासानंतर पोलिसांनी रंजनकुमार सिंग याला मुंबईतून, तर निक्कुकुमार सिंग याला बेंगळुरूहून ताब्यात घेतले. आरोपींच्या कबुलीनुसार पोलिसांचे पथक बिहारमधील सितामढी येथे गेले आणि तेथून चोरीस गेलेले १४ तोळे सोन्याचे दागिने हस्तगत करण्यात यश मिळविले.
निक्कुकुमार देवकी सिंग (वय २२, जि. सितामढी, बिहार),रंजनकुमार देवकी सिंग (वय २०, जि. सितामढी, बिहार),राजकुमार ऊर्फ प्रिन्सकुमार विजय पासवान (वय १९, जि. रोहतास, बिहार),डिंपल पटेल विनोद सिंग (वय २६, जि. कैमूर-भभुआ, बिहार) अटक करण्यात आलेल्या आरोपींची नावे आहेत
ही कारवाई पोलीस आयुक्त विनयकुमार चौबे, सहपोलीस आयुक्त डॉ. शशिकांत महावरकर, अपर पोलीस आयुक्त सारंग आव्हाड, अपर पोलीस आयुक्त बसवराज तेली, पोलीस उपायुक्त श्वेता खेडकर, सहायक पोलीस आयुक्त प्रिया डमाळे यांच्या मार्गदर्शनाखाली वरिष्ठ पोलीस निरीक्षक दिगंबर सूर्यवंशी, सहायक पोलीस निरीक्षक कल्याण घाडगे व उत्तर महाळुंगे पोलीस ठाण्याच्या गुन्हे शोध पथकाने केली. पुढील तपास सहायक पोलीस निरीक्षक कल्याण घाडगे करीत आहेत.
