पुणे (दक्षिण म्हाळुंगे) दि. २३ जुलै : दक्षिण महाळुंगे एमआयडीसी पोलिसांनी आणि दारूबंदी पथकाने स्वतंत्र कारवायांमध्ये बेकायदेशीर हातभट्टी दारूची वाहतूक व साठा करणाऱ्या दोघांविरुद्ध गुन्हे दाखल करून त्यांना ताब्यात घेतले आहे. या कारवाईत एकूण ६१ लिटर हातभट्टी दारू जप्त करण्यात आली.
पहिल्या प्रकरणात दक्षिण महाळुंगे एमआयडीसी पोलीस ठाण्यात गुन्हा क्र. ६१५/२०२६ दाखल करण्यात आला आहे. दारूबंदी पथकाच्या पोलीस शिपाई ज्योती शेखर बारणे यांनी दिलेल्या फिर्यादीवरून २२ जुलै रोजी सकाळी येलवाडी (ता. खेड) येथील कंजारभट वस्ती परिसरात कारवाई करण्यात आली. या वेळी गुंजन शंकर राठोड (वय २०) हिच्याकडे ३१ लिटर गावठी हातभट्टी दारू (किंमत ३,१०० रुपये) तसेच वाहतुकीसाठी वापरण्यात आलेली सुमारे ६० हजार रुपये किमतीची होंडा अॅक्टिव्हा (एमएच-१४ एमजे-७४४३) आढळून आली. या प्रकरणात गणेश राठोड याने सदर दारू पुरवल्याचा आरोप असून गुंजन राठोड हिला अटक करण्यात आली आहे.
दुसऱ्या कारवाईत दक्षिण महाळुंगे एमआयडीसी पोलीस ठाण्यात गुन्हा क्र. ६१६/२०२६ दाखल करण्यात आला आहे. पोलीस शिपाई राजकुमार दामोदर हनमेंते यांच्या फिर्यादीवरून २२ जुलै रोजी सायंकाळी मोई येथील ग्रँड हॉटेलसमोरील पत्र्याच्या शेडजवळ छापा टाकण्यात आला. या कारवाईत महेंद्रसिंग जयसिंग राठोड (वय ४६, रा. फलड्डे वस्ती, मोई) याच्या ताब्यातून ३० लिटर हातभट्टी दारू (किंमत ३ हजार रुपये) जप्त करण्यात आली. आरोपीला पोलिसांनी ताब्यात घेतले आहे.
दोन्ही प्रकरणांमध्ये भारतीय न्याय संहिता तसेच महाराष्ट्र दारूबंदी कायद्यान्वये गुन्हे दाखल करण्यात आले असून पुढील तपास दक्षिण महाळुंगे एमआयडीसी पोलीस करीत आहेत.
