‘सेफ फूड, सेफ ड्रग, सेफ महाराष्ट्र’ मोहिमेंतर्गत मोठी कारवाई; अन्न सुरक्षा नियमांचे उल्लंघन करणाऱ्यांवर प्रशासनाचा बडगा
पुणे प्रतिनिधी: अन्न व औषध प्रशासनाने (FDA) राज्यभर सुरू असलेल्या ‘सेफ फूड, सेफ ड्रग, सेफ महाराष्ट्र’ या विशेष मोहिमेअंतर्गत पुण्यात मोठी कारवाई करत १० हॉटेल्स, बेकरी, केटरिंग सेवा आणि रेस्टॉरंट्सचे अन्न व्यवसाय परवाने तात्पुरते निलंबित केले आहेत.
अन्न व औषध प्रशासनाच्या अधिकाऱ्यांनी केलेल्या तपासणीत संबंधित आस्थापनांमध्ये अस्वच्छ वातावरण, अन्न सुरक्षा व मानके कायद्याचे उल्लंघन, अन्न हाताळणीतील त्रुटी तसेच स्वच्छतेच्या नियमांकडे दुर्लक्ष झाल्याचे निदर्शनास आले. त्यानंतर संबंधित आस्थापनांविरोधात तातडीने कारवाई करण्यात आली.
परवाने निलंबित करण्यात आलेल्या आस्थापनांमध्ये Golden Bakery, Golden Majestic Bakery, Star Catering Service, Ashok Bar & Restaurant, Biggies Biryani LLP यांच्यासह एकूण १० खाद्य व्यावसायिकांचा समावेश आहे.
अन्न व औषध प्रशासनाने स्पष्ट केले आहे की, नागरिकांना सुरक्षित, स्वच्छ आणि दर्जेदार अन्न उपलब्ध करून देणे ही प्रशासनाची प्राथमिक जबाबदारी असून, अन्न सुरक्षा नियमांचे उल्लंघन करणाऱ्या कोणत्याही आस्थापनाला पाठीशी घातले जाणार नाही. नियमांचे पालन न करणाऱ्यांविरोधात भविष्यातही अशाच प्रकारच्या कठोर कारवाया सुरू राहतील, असा इशाराही प्रशासनाने दिला आहे.
अन्न व औषध प्रशासनाने नागरिकांनाही आवाहन केले असून, अस्वच्छ किंवा संशयास्पद अन्न विक्री होत असल्याचे आढळल्यास त्याची माहिती प्रशासनाला देण्याचे आवाहन करण्यात आले आहे.
